Evento di Drone Racing super exitoso

Diadomingo a tuma lugar un evento internacional di Drone Racing. E actividad a resulta un exito rotundo. Pa e race aki a bin tres piloto di Hulanda, tres di Corsou y e pilotonan di FPV Aruba cu ta mas o menos 10 persona. E evento a tuma lugar na Mambo Beach unda antes Bushiri Hotel tabata situa.

Un biento sumamente fuerte a dificulta e race, sigur door cu e biento a lanta masha hopi santo mes cu a forma varios biaha tormentanan di santo. Esaki no solamente a pone e reto mas grandi ainda pa e pilotonan, pero tambe pa esnan cu a bin mira y goza e evento. A bin mas o menos 200 hende cu a bin bay debi na e biento fuerte y e santo y stof cu tabata lanta henter ora. Riba peticion di e organisadornan Brandweer a coopera y a muha e santo loke a duna alivio temporalmente.

E race a cuminsa y a termina na tempo. Tabatin varios race di cualificacion unda Vince Irie di Aruba a resulta e miho piloto, sigui pa Dino, Sander y Tim. Durante e ultimo caredanan cu ta cuatro laps, Vince a crash su drone na dos ocasion y a termina na di 4 lugar, Tim na di tres lugar, Sander na di dos lugar y Dino a bay cu e prome premio. E prome premio tabata consisti di un suma di 500 dollar, di dos lugar 300 dollar, di tres lugar 200 dollar y di 4 lugar 100 dollar. E prijzengeld a wordo poni disponibel door di Lotto pa Deporte. Di e bebida di energia Rockstar e ganador absoluto a haya un tas di drone y otro tres ganadornan a haya algun gadgets.

Tabatin un ronde di perdedor unda e tresnan cu a gana a haya algun bunita regalo cu a wordo poni disponibel door di Immersion Inc., un compania mundial di drone. FPV Aruba ta yama danki na Cede Aruba, Lotto pa Deporte, Rockstar pa nan aporte y DOW pa e tentnan y baricada y Rode kruis pa nan presencia, Brandweer cu a bin yuda calma e stof y santo cu tabata fuertisimo. Tambe Polis y Directie Luchtvaart pa nan atencion. E evento aki a pone Aruba riba mapa mundial di drone racing y den e dianan aki e pilotonan lo pone nan footage riba social media unda nan lo haya atencion tur rond mundo.

Lo sigui mas di e racenan aki y pesey ta bon pa bin cu leynan pa reglamenta mas pronto posibel e bulamento di drone na Aruba. Parlamentario Robert Candelaria ta bezig pa entrega un proposicion di ley riba e tereno aki. Sr. Candelaria tabata presente na e evento y mirando su interes grandi pa drones y ‘drone racing’ FPV Aruba a dun’e e honor pa habri e actividad formidabel aki.