Sindicato Independiente WEB Aruba (SIWA) tampoco no a keda atras den reacciona riba posibel aumento di prijs di awa y coriente. Esaki ta despues cu gerencia di WEB Aruba NV a haci un peticion na Utilities NV pa aumenta tanto awa como coriente. E discusion riba prijs di awa y coriente, ta percurandl pa un presion grandi den WEB awor aki.
Erick Henriquez, Presidente di SIWA, a splica cu no tin contacto cu Director. “E cos aki a cay como un sorpresa inmenso. Ta haya esey como un falta gravisimo cu ora cu algo asina cu ta toca e compania na unda cu CAO, riba su mes ta papia tambe cosnan cu ta afecta esaki, cu ta afecta compania, mester discuti cu sindicato. Ta algo cu sin duda lo afecta seriamente e maneho diario di funciona y nada no a wordo bisa na sindicato”.
Ora cu e noticia a sali den medionan di comunicacion, ta e momento ey SIWA a haya sa, cu un carta lo a bay pa Utilities, of unda el a bay. Un hecho ta cu un carta a bay. Esey ta loke e sindicato a para riba. Nan kier wak kico lo pasa y consecuencia cu e lo tin pa e compania, unda cu SIWA, como sindicato di WEB sin duda nan ta salvaguardia e existencia di WEB den e cos aki, pero tambe tin cu bisa cu ta para na banda di pueblo, na unda cu nan ta wak cuenta di hisamento di prijs di awa y coriente, ta haya esey e manera di mas facil cu tin.
Ta calcula cu Directornan mester haci nan huiswerk mas miho, unda cu tin cu evalua tur scenario cu por tin, unda cu na ultimo luga pueblo mester carga e consecuencia. Gerencia mester sali pa defende e compania su existencia y manten’e na un manera sano completamente.
No ta prome biaha
Henriquez a yega di vocifera cu mester keda serio. Mester trece tur e stakeholdernan hunto, pa WEB por duna un splicacion kico tur ta pasando. Tin un comision di energia, cual mester a cay caba den esaki, Parlamentarionan ta bon pa yama e Director aden, pidi mas splicacion y duna un presentacion unda nan tur nan ta para. Ta representantenan di pueblo. Henriquez a enfatisa cu nan mester sa kico ta pasando.
Unda esey ta pasando pa trece tur e gruponan hunto, haci’e un discusion publico, laga prensa y pueblo tambe tey. E ora por haya sa kico precies ta pasando. Awor aki ta un rancamento di cakiña. Awor aki ta un esey di, nan di. Ban habri tur cos riba mes, saca tur carta, ban pone kico tur ta pasando. Asina aki ta keda tira otro cu lodo y no ta keda cla.
Espacio
Awor aki ta pueblo ta prome. Mester trece tur stakeholder hunto y laga nan papia. Directornan mester mustra kico ta pasando unda nan ta bayendo. Scenarionan mester ta poni riba mesa y tambe e faha den WEB mester ta mara. Prome cu bay castiga of tuma medida riba pueblo, mester mara faha den cas prome. No tin discusion eynan. SIWA ta cu pueblo y kier pa tur cos sali manera e mester ta pa tur hende compronde kico ta pasando. No un grupo chikito so scondi aki aya y warda te ora cu un carta slip sali den media, e ora ta bay haci desordo. Nos ta na 2018 y cosnan aki mester ta standard ora di trece pa pueblo. E cosnan aki mester ta na nivelnan halto pa tur hende sa.
E carta
Henriquez ta bisa cu mester habri wowo, wak’e y yama e Director puntre kico ta pasando. Si e carta ta existi, e ora bo ta bay puntra e motibo y pakico, e scenarionan mester cay riba mesa y haya sa kico ta pasando. Asina simpel e cos aki ta. No por sconde cabes den tera y kere cu e carta ta disparce. Si tin problema, fix’e.
