Departamento di Impuesto ta informa cu entrante 1 di juli 2018, tin algun cambio den e ley di BAZV. Siguientemente ta sigui un splicacion cortico relaciona cu algun di e cambionan pa cu BAZV.
Kende tin cu paga BAZV?
E empresario ta e suheto, pues e ta esun cu tin cu paga BAZV na Departamento di Impuesto. Un di e cambionan di ley ta encera ampliacion di e concepto di empresario. Pa ley e empresario ta tur esnan cu ta eherce un profesion of empresa independientemente como tambe tur esnan cu ta haci negoshi cu bienes/capital pa saca ganashi permanentemente.
Riba kico ta cobra BAZV?
E base pa cobra BAZV no a cambia. Ta cobra BAZV riba e volumen di benta di empresa (bedrijfsomzet). Esaki ta e suma bruto cu e empresario ta ricibi di su clientenan na momento cu e bende un producto of servicio.
Ora ta papia di e volumen di benta di empresa ta mantene en principio e sistema di cash. Esaki ta nifica cu e debe di BAZV ta surgi na momento cu e empesario ricibi pago (compensacion) pa e producto of servicio cu el a bende.
Cua ta e tarifa di BAZV entrante 1 di juli 2018?
Entrante 1 di juli 2018 e tarifa di BAZV ta cambia y ta bira 3%. Pues e empresario ta paga 3% na BAZV di e suma ricibi di su di benta di producto of servicio.
Calculacion di BAZV
Aki ta sigui un ehempel con pa calcula e BAZV:
Suma ricibi di benta di producto of servicio Afl. 100,–
E BAZV cu e comerciante mester paga ta Afl. 3,00 (3% di 100,00). E ta paga e suma aki na Departamento di Impuesto.Si e comerciante a cobra su cliente Afl. 103,00 e ora e tin cu paga Afl. 3,09 na BAZV (3% di 103,00).
Haci declaracion di BAZV
E empresario ta haci declaracion y pago di BAZV riba un base mensual y no mas laat cu dia 15 di cada luna. Den esaki no a bin cambio. E prome declaracion basa riba e tarifa di 3% ta regarda e luna di juli 2018 y mester entrega e declaracion y haci e pago corespondiente no mas laat cu dia 15 di augustus 2018.
Formulario di declaracion
Pa e periodo di juli te cu december 2018, Departamento di Impuesto ta pidi tur empresario pa declara BAZV riba e mesun formulario di BBO/BAZV cu nan a ricibi na comienso di aña. Pues e empresarionan no lo ricibi un formulario di declaracion nobo. Ta intencion pa adapta e formulario di declaracion pa aña fiscal 2019.
Comerciante mester menciona e suma di BAZV riba e recibo
E ley di BAZV ta impone cu e comerciante mester menciona e suma di BAZV riba su recibo. Cu e stipulacion aki mester compronde cu no ta necesario pa pone BAZV den forma di un calculacion riba e recibo. Simplemente mester menciona cua ta e suma cu ta regarda BAZV. E idea tras di e stipulacion aki ta pa e cliente por mira cuanto BAZV e comerciante tin cu paga na Departamento di Impuesto (transparencia).
