Empleadonan di Post Aruba N.V. a celebra 125 aña di existencia

Recientemente Post Aruba N.V. a celebra su 125 aña en grande. Servicio Postal di Aruba a inicia 125 aña pasa dia 1 di Augustus y durante añanan a sa di conoce cambionan. Post Aruba N.V. a crece y durante añanan a modernisa, pe Post cu tin awendia.

E empleadonan a celebra e 125 aña di Post Aruba N.V. na Indian Rock Garden, unda nan a disfruta di e anochi. Na yegada di e empleadonan, director di Post Aruba N.V. Guillermo Raymond, hunto cu su Head Marketing Katharine Lacle y Sales Executive Joraine Lopez, tabata duna bon bini na e empleadonan unda cu nan tabata ricibi un pin di 125 aña y un champagne di bon bini. Empleadonan tabatin e oportunidad pa saca potret na e backdrop di 125 aña y despues tabata saca potret na e picture booth unda nan por a saca potret “loco”. Guillermo Raymond a recorda e empleadonan cu nan a celebra 125 aña di cual trayectorio ta uno hopi largo. Durante añanan Post Aruba ta encarga pa entrega e cartanan na tur hende, nan a percura parenoba nan funcion y balor den comunidad. “Nos mester ta gradici na esnan cu a aporta durante e añanan. Yama nan danki pe labor integral.

Tambe mester gradici pa unda Post Aruba N.V. ta actualmente”, Guillermo Raymond a expresa orguyosamente. E banda cu a entretene empleadonan di Post Aruba N.V. tabata D'Licious. Bailadonan di Post Aruba N.V. a subi pista y no tabata kier a baha. E famia di Post Aruba N.V. tabata contento di por a pasa un momento agradabel y ta corda cu sin e sosten di comunidad pa 125 aña nan no por existi. A funda e compania priva Post Aruba N.V. na aña 2005. Su oficina principal ta situa na J.E. Irausquin Plein # 9 na Oranjestad y tin 2 oficina adicional na Santa Cruz y San Nicolas. Ey ta ofrece tur tipo di servicio, for di manda un envelop, te na carga pisa. Post Aruba N.V. ta conta cu 111 empleado, cu diariamente ta yega na 42 mil adres situa tur rond di nos isla. Mas cu djis un servicio, e empleadonan atento ta percura pa tanto comunidad como sector comercial por comunica cu otro. Pa mas informacion riba servicionan di Post Aruba N.V., bishita e website www.postaruba.com of check nan paginanan riba Facebook, cu ta Post Aruba N.V.y Aruba Stamps.