Recientemente empleadonan dinamico di Dufry a participa na un sesion yama “Team Building”, ofreci dor di Elsa Krozendijk. E sesionnan a tuma luga den e edificio di ATIA na Dakota y a tuma mas o menos 1 siman di tempo, pa por a logra haya tur empleado cu ta traha na diferente tienda durante diferente orario.
E programa extenso a encera diferente forma pa e empleadonan por a cera conoci di cerca cu otro, cu cualidadnan di otro y con hunto por ofrece mas y miho servicio na clientenan. Henter e idea di un programa asina ta pa expone e potencial di cada un empleado dilanti e otro, pa tur ta consciente cu uni so por logra metanan grandi, tanto individual como colectivo.
Despues di e siman largo di training, a celebra e final na Chill Cafe, durante un evento bon atendi, masha ameno den cual empleadonan por a canta y baila henter anochi.
Dufry Aruba ta existi pa por lo menos 20 aña caba y ta conta cu 10tienda den Aeropuerto Internacional Reina Beatrix, 1 tienda den caya Betico Croes y 1 tienda den Royal Plaza. Hunto nan ta conta cu 80 empleado servicial, cu bon experencia y conocemento di e productonan varia cu nan ta bende, dependiendo di cada tienda.
