Wednesday, 16 April 2014
Discurso di Glenbert Croes: 27 di september lo rescribi historia. 27 di september Idealismo lo vence Materialismo Print E-mail
Monday, 12 August 2013 17:54

Glenbert discurso 2013

Diabierna dia cu a entrega lista, Partido MEP e mesun anochi a haci presentacion oficial di tur su 29 muher y hombernan cu 27 di september proximo lo trese e cambio pa miho cu Aruba merece.

Glenbert cu e anochi aki a wordo acompaña pa su querida mama, su dos yiunan, su rumannan y su subrinonan, a inicia bisando cu ta pa su persona un gran honor pa awe e por ta dirigiendo palabra na esnan presente como miembro y candidato di Movimiento Electoral di Pueblo, cual confianza e lider di Partido Evelyn Wever Croes a deposita den su persona. A continua dirigiendo su mes na E Lider presente cu e mensahe cu un y tur lo sa di reciproca e confianza aki cu e guia cu Evelyn Wever Croes lo duna na Partido. “Mi kier bisa boso cu awe nochi mi ta acompaña na e momento especial aki den mi bida, den nos bida como pueblo, door di mi mama, mi rumannan, mi yiunan y mi subrinonan cu awe nochi ta compartiendo e momento aki cumi. E ta hacimi recorda Ser’i Noca unda cu mi tata a expresa e palabranan cu e no ta un tata pa un hogar chikito di homber y muher cu 4 yiu, sino cu e ta un tata pa henter e pueblo di Aruba. Pesey na mi mama, mi rumannan, mi yiunan, mi subrinonan, esaki ta nos hogar Movimiento Electoral di Pueblo, esaki ta nos cas. Danki pa tuma nos bek den nos cas. Nos ta bibando momentonan importante pa como pueblo nos haci evaluacionnan importante pa nos sa unda nos ta para y ki decision nos mester tuma 27 di september. Nos mester realiza nos realidad, cu Aruba nos mester salbe awo. Aruba mester di nos awo. E lucha cu a wordo hiba no por ta envano. E lucha cu tur nos bieuwnan y nos a lucha pe, no por tabata envano. Pesey nos ta recordando e palabranan: Ki bal un homber sin derecho. Ki bal un homber sin bandera. Ki bal tin curazon den bo pecho si bo no ta liber den bo tera. E Gobierno aki tin e pueblo aki preso den e prison di necesidad pobreza y debe. E Gobierno aki tin e futuro di nos yiunan preso den e prison di un futuro sin speranza. Pero 27 di September, Aruba merece miho, nos pueblo lo defini y cambia e curso di nos destino, 27 di september nos lo rescribi historia di Aruba unda un 22 di November 1985 ora nos Libertador a bisa cu materialismo a vence idealismo, 27 di september e pueblo aki cu pulmon yen di orguyo lo rescribi historia gritando idealismo a vence materialismo. Y voz di nos pueblo lo prevalece. Voz di Pueblo ta Voz di Dios. Cu nos pueblo wordo bendishona pa nos bon Dios. Masha danki pa e honor grandi aki.” Palabranan di un Glenbert Croes sumamente emociona na e ocasión historico aki den su bida unda cu porfin despues di 23 aña e por forma parti di e partido cu su tata a funda. Un decision di Lider Evelyn Wever Croes kende a demostra cu e decision aki, di tin interes general di partido na prome lugar, kende a demostra cu e hecho aki cu interes general di Aruba lo prevalece den tur su decisionnan como Politico y Gobernante.

 

Connect with Us

Newsletter