Ekiponan di futbol femenino cu yamada urgente na AVB

Ta di lamenta cu esnan cu aña pasa a bin cu un expo masha grandi mes pa purba di promove futbol femenino bou di particularmente mucha muhenan jong, awe, casi un aña despues, ta tuma un decision cu por hiba futbol femenino atras cu stapnan grandi.
Ta dialuna 23 di October 2017 cu AVB, e federacion nacional di futbol, a yama un reunion general den cual a simplemente participa e schedule pa e campeonato 2017/2018 na e teamnan presente. A warda basta pa e competencia cuminsa y pesey AVB a haya ta bon pa saca un Schedule sin considera e interesnan di e teamnan femenino.
Ta bon pa remarca cu contrario na futbol di hende homber, futbol femenino tin un categoria so. Un asina yama open klasse. Na momento cu un mucha muher haci 13 aña e no mag participa den teamnan mixto mas pero solamente den e campeonato femenino. Dus Open klasse ta di 13 aña bay ariba sin un edad maximo (den practica bo por tin hungadonan di 13 aña riba veld cu damanan di 40+). Esaki ya caba ta un punto di atencion pero supuestamente AVB ta trahando riba loke ta promove futbol bou di hobenan femenino pa yuda esaki.
Pero e sorpresa di e reunion tabata cu a saca un Schedule caminda tur wega ta den siman (dialuna, diamars y diaranson) pa 8.00 di anochi. Esaki pa varios team ta inaceptabel. SV UNDESA a manda un peticion pa AVB pa yama un reunion urgente pa por haci cambio den esaki.
Ariba e peticion aki AVB no a ni sikiera responde.
A mustra AVB ariba e siguiente puntonan cardinal:
1. Durante campeonato 2016/2017 tur team femenino a firma un carta conhuntamente y a pidi AVB pa schedule weganan den weekend so. AVB a tene cuenta cu esaki den di dos rond di campeonato pero awor parce cu tin amnesia atrobe;
2. Tur wega sin excepcion ta den siman y anochi 8 or. Esey kiermen cu mas tempran cu wega lo caba ta 10.00 di anochi. Pa muchanan cu ta bay scol esaki ta bira imposibel pa por participa na un campeonato asina. Enseñansa ta di suma importancia y parce cu AVB no kier tene cuenta cu esey.
3. E siman cu porfin a bin cu weganan ta e siman cu mayoria scol tin s.e. of cp- periode. AVB tal bes ta verwacht cu e muchanan ta bay hunga futbol enbes di cp of s.e?
E excusa cu ta duna ta cu tin scarcedad di veld y esey so ta posibel y door cu a tarda esey so a resta. Pero division di honor y division 1 si ta hunga weekend. E otro divisionnan masculino e weganan ta mas tarda 6 or of 7.00 ( y no ta dura 45 minuut pa banda). Pero e ta tur biaha e teamnan femenino cu ta wordo perhudica door di AVB.
NO tin comprension pa e teamnan miembro y/ of nan peticionan y no tin consideracionan pa e muchanan hoben cu ta bay scol, esunan cu ta bay avond MAVO of avond HAVO y esnan cu ta traha of ta mayor.
E accionan di AVB ta bay kibra e poco cu tin di futbol femenino y ta parce manera nan no kier ni sinta na mesa y delibera ariba solucionan. Na tur caminda di mundo ta purba di encurasha futbol femenino y na ARUBA esunan encarga cu esaki ta tuma decisionan cu lo percura cu e hungadornan no lo tey mas.
Ta importante pa subraya cu esaki no ta opinion di un ekipo so pero di varios otro. Mayoria team tin hungadornan jong y ta premira cu te hasta teamnan no lo ta completo y/of lo mester cay afo door di esaki. Esaki ta condenabel y seriamente di lamenta. Esaki no ta loke miembronan ta spera di nos federacion nacional!
Un suplica publico ta bay pa AVB pa para e campeonato 2017/2018 y sinta na mesa cu e teamnan fememino pa traha un schedule den cual e hungado ta central y na bienestar di futbol femenino.