Gabinete Evelyn Wever–Croes, manera cu el a sinta a cuminsa cu e proceso di reduccion di gastonan cu ta cay bou di cada ministerio, unda cu pa cuminsa a baha e cantidad di ministernan di 9 pa 8.
Banda di esaki tambe cada ministerio no por conta mas cu 25 trahador y unda cu tin minister cu ainda no a yega 15 trahador. Den e proceso aki Prome Minister a anuncia cu den un termino corto a corta gastonan di su personal den careda di 8 miyon florin.
Banda di esaki tambe tin contractnan despropocional cu mayoria lo a termina pa fin di januari y tambe tin contractnan di lease di autonan cu a ser kibra pa motibo cu como ehempel un ex Prome Minister so tabatin 5 auto, di cual 3 tabata pick up cu a ser usa pa campaña político y unda cu ainda tabatin sticker di AVP riba nan. Tur esaki como muestra di tin prioridad den baha gastonan y drecha finansa publico cu bou di Gabinete Eman 1 y 2 solamente a conduci na KB y supervision financiero.
Reduccion gastonan di personal
Por a tuma nota den Diario di 20 maart 2018 na pagina 21, unda cu Parlamentario Robert Candelaria ta cuestiona y mustra su duda cu enberdad ta haciendo lo maximo pa reduci gastonan di personal y ta traha na mehoracion financiero di Aruba y cu unda e tin e impresion cu lo ta tuma mas hende den servicio y cu ta crea duda cu enberdad lo tin menos coordinador. Y sigur unda su persona a manda 23 pregunta pa Prome Minister pa haya un lista di kendenan tur a ser tuma den servico, cua companianan ta ser usa pa consulta y nan salarionan. Den esaki e articulo aki tambe a pone mi persona pa haya contesta den cuadro di transparencia y sigur di integridad, unda cu mi persona tambe lo tin algun pregunta cu ta regarda salario di coordinador y contractnan cu a ser cancela. Y un sigur cu tin den wandelgang pero mi lo kier confirmacion y aki mi ta duna pueblo preguntanan cu lo mi manda por escrito pa Prome Minister y mi lo pone pueblo na altura di e contestanan ricibi.
Preguntanan na Prome Minister
- Si enberdad Sr. Robert Candelaria tabata tin un contract pa ta coordinador durante periodo di Gabinete Eman 2? Y kico tur a ser cubri den e contract aki (mudamento pa Aruba, auto etc)?
- Si esaki ta berdad, kico tabata su tareanan cu su persona tabatin pa hustifica su contracto?
- Si enberdad Sr. Robert Candelaria tabatin un landsbesluit cla pa firma como Director di Directie Scheepvaart?
- E nombramento aki a bay via un openbare sollicitatie?
- Si esaki ta berdad, por bisa nos den ki periodo esaki a ser traha?
Sigur den cuadro di transparencia y integridad y tambe pa locual ta trata reduccion di gasto y tambe drecha finansa publico, esakinan ta preguntanan hopi importante pasobra asina nos y pueblo por haya un bista con pueblo su placa a ser malgasta y cu si enberdad Sr. Robert Candelaria ta parti di e Mega Debe crea door di su gobierno y unda cu awendia pais Aruba tin un debe cu ta 91% di nos GDP y ta na borde di bancarota. Lo ta bon pa pueblo por sa kendenan tur ta complice di esaki y unda cu nos tambe por exigi pa cosnan asina no pasa mas cu placa di pueblo ta ser malusa na beneficio personal.