Tin un preocupacion chikito cu e mercado laboral y kier a acerca, Hubert Dirksz kende ta presidente di sindicato FTA, cu kisas por a tende di e desaroyonan aki. Por a tuma nota di dos compania grandi caba cu ta pasando hopi problema, pa motibo cu ora nan mester di hende por ehempel, of ora nan ta bay haci cierto test riba trahadonan, ta resulta cu nan ta test positivo pa droga. Tin un situacion poco alarmante na Aruba pa uzo di droga. FTA ta haya feedback di parti di e companianan cu ta deal cun’e como sindicato. E ta sigui splica cu tin e informacion eynan for di basta tempo caba. Sa tambe cu na cierto momento si no ta hera cu universidad di Aruba a haci investigacion cu hobennan cu a yega di haci uzo di droga di un of otro manera. E resultado eynan tabata alarmante, sigur na pia di trabao. Tin den bastante contracto colectivo un articulo cu ta bisa cu compania tin e derecho pa laga su trahadonan tanto di gerencia, di ariba te abao of vice versa, haci test riba uzo di droga of alcohol. Sa cu na Aruba te hasta aparato Gubernamental tabata tin intencionnan pa bin cu un ley of un condicion pa laga e trahadonan haci e test. Pero di berdad esey no a ser realisa, no a wordo logra. Ta compronde pa motibo cu no solamente e droga ta un problema, esta e uzo di marihuana of cocaina of otro producto, pero si e alcohol ta un nivel hopi halto na Aruba. Tin caso cu trahadonan a perde trabao y hopi biaha e trahadonan aki no tin un caminda pa bay pa haya tratamento. Esey awor aki ta un problema. Antes tabata tin SAMBA. Awor aki tin, pero pa esnan cu tin problemanan hopi mas serio. Cu otro palabra, si no pone atencion na esey, mescos cu tin dropout di scol, kisas tambe pa e mesun motibo, pero dropout for di mercado laboral. Esey ta pasando pasobra tin dunadonan di trabao ta bisa cu e ta dispuesto pa mantene un hende na trabao, pero si di berdad e persona aki por wordo rehabilita na momento cu e wordo rehabilita, e por drenta sin problema. Pero bo ta haya cu tin trahadonan ta bay di un compania pa otro. Nan ta perde nan trabao na un empresa, bolbe haya chens y bolbe perd’e. Claro cu e trahadonan mester tin e second chance, pero mester tin un infrastructura pa atende cun’e. Di berdad e ta un problema, segun Dirksz.
