E trompet cu mester sigui toca

Recientemente a tuma lugar un momento hopi special. Momento na cual e trompet di e famoso trompetista sr. Don Hector Hasham d.f.m. a ser traspasa pa e conosido musico, Oslin Trimon.

Ta asina cu Don Hector Hasham prome cu ela fayese a duna ordo na su jiunan cu despues di su morto e kier pa su trompet sigui toca, y e kier pa traspasa su trompet pa Oslin Trimon. Famia mes a keda hopi sorprendi pa e decision aki. Su motibo tabata cu e no kier pa su trompet keda como un pronkstuk, e kier pa su trompet sigui toca. Trimon mes a keda masha sorprendi y honra pa cu e gesto aki. Trimon a tuma e trompet, un Selmer k-modified di anja nan 50 for di man di Igor Hasham, e trompet mes ta un collector’s item. Don Hector Hasham cu su orquesta Sumedad H, den anja nan 80 a jega di acompanja Oslin Trimon como cantante, cu e mesun trompet aki, tempo Trimon a bira e prome Rey di Tumba Infantil den historia di Aruba.

Despues di anjanan Trimon cu tambe a forma su mes musicalmente y a bira trompetista a toca hunto cu Don Hector Hasham den banda. Pues maestro cu alumno hunto. Trimon na su turno a priminti famia Hasham cu e trompet lo sigui toca. Y dia cu e, Trimon mester bai, e lo zorg pa e trompet bolbe cambia di man pa un otro pa e sigui toca conforme deseo di Don Hector Hasham d.f.m.