Diadomingo 24 di juni proximo, Aruba Triathlon Association lo organisa e grandioso 32 edicion di e Aruba International Triathlon cu lo conta un bes mas cu participacion internacional di atletanan cu lo bini for di paisnan manera Venezuela, Colombia, y Curaçao.
Mas cu claro no por lubida nos propio atletanan di Aruba cu a prepara nan mes den e miho forma posibel pa duna un bon prestacion e mainta aki.
Tur cos ta mustra cu e participacion di atleta e aña aki lo surpasa e cantidad di aña pasa esaki sin duda ta danki na e tremendo trabou cu e federacion di Aruba triathlon ta bin ta hasi den e ultimo añanan caminda e deporte a crece enormemente. Mas y mas nos por a nota un crecimento den e deporte di triathlon caminda chikito y grandi a mustra nan interes den sigur un di e deportenan di resistencia mas pisa na mundo. Es mas, na Aruba mes diferente atleta cu ta eherce un otro deporte ta competi den e circuito di triathlon, sea nan ta core, core bicicleta of core na pia.
Mester bisa cu den e di 32 edicion di e Aruba International Triathlon por competi riba e distancia Olimpico cu ta 1500 m landa – 40 km core bicicleta – 10 km core na pia, mientras e distancia di Sprint lo mester landa 750 m – core bicicleta 20 km – 5 km core na pia. Lo por competi den e categoria Olympic / Sprint Masculino: 16-19, 20-29, 30-39, 40-49, 50-59 y 60+ Olympic / Sprint Femenino: 16-19, 20-29, 30-39, 40+. E Relay lo ta solamente riba e Olympic Distance. E evento ta programa pa cuminsa pa 6:30 di mainta na Eagle Beach. Diasabra 23 di juni tin package pick up na Tulip Restaurant, enfrente di Eagle Beach di 4or pa 6or di atardi.
Aña pasa, e atleta elite y alabes 3 bes Atleta di Aña Local, Renze Postma a gana e competencia cu un record nobo. E atleta Postma a registra un tempo di 1.57.34 cual tabata cinco minut di e marca anteriormente estableci pa e propio Postma na aña 2016. Mas cu claro, Postma lo tey un bes mas pa defende su titulo y purba na mehora e record poni na 2017.
Stichting Sportsubsidie Aruba tambe a yuda subsidia e di 32 edicion di e Aruba International Triathlon organisa pa e federacion Aruba Triathlon Association.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
