Direktor General saliente di UNESCO sra. Irina Bokova a enfatisá ku e bon koperashon entre e Komishonnan Nashonal pa UNESCO ku e organisashon, ta e base di éksito pa funshonamentu den forma optimal. Durante e Konferensha General aki paisnan ta bai vota pa un Direktor General nobo i sra. Bokova a enfatisá ku su presesor ta bai tin un reto pa enfoká riba entre otro redukshon di riesgu i edukashon duradero. E delegashon di Kòrsou den nan enkuentro ku sra. Bokova a gradisié pa a promové i duna importansia na Small Island Developing States (SIDS) i pa e esfuerso di pone SIDS mas prominente riba agènda di UNESCO i duna nan mas sosten.
Mas aleu a gradisí Direktor General saliente sra. Bokova pa e atenshon ku UNESCO ta duna na konservashon di Willemstad komo patrimonio mundial i e ekspertisio ku nan ta brinda. Direktor General saliente sra. Bokova a sigurá ku e lo traspasá e puntonan ku a bin dilanti pa su susesor.
Durante e di kuater dia di e Konferensha General, e delegashon a sigui ku reunionnan tambe ku Direktor Katherine Grigsby, di e Ofisina na Jamaica kaminda a resaltá posibilidatnan pa interkambio entre Reino Hulandes, Ofisina di UNESCO na Jamaica i Kòrsou den region. Den e enkuentro ku e hefe di e sekshon di Siensia sosial i humano riba Historia i Memoria pa Dialogo, komishonnan Nashonal di Hulanda, St. Maarten i Kòrsou a akordá ku nan ta bai traha huntu riba un evento di konmemorashon na okashon di 155 aña abolishon di sklabitut den Reino.
Finalmente den e reunion ku e Direktor General Asistente enkargá ku Komishonnan Nashonal di UNESCO, sr. Eric Falt, e delegashon a haña oportunidat di interkambiá riba e trabounan ku Komishon Nashonal di UNESCO pa Kòrsou.
