Si ta trata di un stroke, infarto, un blokeo den un di e adernan, tin un periodo di cuater ora y mey, unda cu dokternan por duna un tratamento pa purba di desolve e blokeo ey, pa asina e parti di celebro ey haya circulacion bek. E tratamento ey yama Trombolise.
E tratamento ey ta uno cu por duna solamente na hospital y via infuus e pashent ta haya remedi pa desolve e prop cu ta stroba e circulacion. Si warda mas cu cuater ora y mey, e dokternan no por duna e remedi mas.
Trombolise ta un tremendo tratamento, pero no tin miho tratamento cu prevencion. Preveni ta miho cu lamenta.
Con ta haci esaki
Ta bon pa haci un analisis di bo factornan di riesgo. Bay cerca bo dokter di cas, tene un combersacion cun’e riba bo salud. No bay solamente ora bo ta sinti algo. Bay preventivo tambe. Aki por controla e presion, por haci testnan di sanger si ta necesario y lo mas importante ta, papia di bo estilo di bida. Tur locual ta toca e manera cu bo ta come, bo movecion, humamento, uzo di alcohol of droga, etc.
E dokter a duna algun tips manera ora di trata di movecion, conseho ta pa haci movecion alomenos 30 minuut pa dia y cinco biaha pa siman. Esaki ta algo cu ta zona hopi. Pero kico ta 30 minuut. Traha tempo p’e. Wak bo mesun estilo di bida. Bo ta haci un trabao cu bo ta hopi sinta, esey ta nifica cu bo falta movecion. Y si bo ta gusta haci movecion, y e ta bay bon, pakico no mas, bo por haci 45 minuut tambe.
Exceso di alcohol: Loke ta bisa ta pa no uza pa hende homber, no mas cu dos glas di alcohol pa dia y pa hende muhe, no mas cu uno pa dia. Mas di esaki lo ta excesivo y ta hisa e risico pa stroke.
Come saludabel: Esaki ta hopi importante. Importante ta pa come na ora. No mester lubida cu e cuminda di mas importante pa dia ta e desayuno. No cuminsa bo dia cu junkfood. Bebe awa na comienso di dia. Ora bo ta wak bo cuminda, pone atencion riba bo porcionnan. Cumindanan manera carni of galiña mester ta na grandura di bo man. Aros, mester ta un comchi den bo man. Un tayo, mita di dje, mester ta di berdura y preferibel diferente colo di berdura. Pone atencion riba e cantidad di salo y sucu cu bo ta agrega na bo cuminda.
Corda cu si bo ta scoge pa pasta of aros, e opcionnan mas saludabel ta integral
Humamento. Si bo ta huma, bo tin cu stop di huma. Esaki tin biaha no ta facil. Kisas b’a purba mas biaha caba pa stop, pero no give up. Ta algo tambe cu dokter di cas por yudabo cun’e, pa bo stop di huma.
Dos otro cos importante ta presion halto y diabetes. E parti fastioso ta cu tin biaha bo no ta sinti cu bo tin nan. Vooral na comienso. Presion halto ta wordo yama e Silent Killer, bo no sa cu bo tin’e.
Pesey ta bon pa controla. E presion mester ta idealmente 120/80. Si wak den e protocolnan nobo cu ta bin awo, mas y mas ta stress riba purba na yega na e presion eynan. Pero presion tambe ta algo cu ta fluctua facil. Si bo ta malo si bo tin dolor, si bo ta preocupa, presion ta hisa facil. Pesey ta importante pa e dokter midi’e mas biaha y no un solo biaha. Si riba un periodo mas halto e ora e dokter ta haci un analisis di cuanto ta e risico cu algo por pasa cubo den e siguiente 10 añanan cu abo ta haya un malesa of ta fayece di un malesa cardiovascular, entre otro di un stroke of tambe un ataca di curason.
Diabetes: tambe ta importante pa controla e sucu y si bo tin diabetes pa bo mantene bo mes na e tratamento. Hopi biaha no ta logra. Awendia tin nursenan specialisa cu ta traha hunto cu dokternan di cas, na cual por haci bo controlnan cada tres luna y un biaha pa aña, hunto cu bo dokter di cas.
Dr. Croes a splica tambe cu Stress ta algo cu si ta dura pa un periodo largo, ta eleva cierto hormoonnan den bo curpa, entre otro cortisol, adrenalina y si nan keda pa un largo tempo eleva den bo curpa, por tin un efecto negativo. Nan tin efecto den full bo curpa.
Pa resumi, A: Alcohol. B: Blood Pressure. C: Colesterol. D: Diabetes y Dieet. E: Ehercisio y F: ta Fat, cu ta obesidad cu bo por haci algo na dje.
Por ultimo dr. Croes a bisa cu Stroke ta un malesa cardiovascular cu ta afecta e celebro cu consecuencianan grave. Ta importante pa traha riba prevencion. Pidi dokter di cas pa haci un analisis di esaki hunto cubo. Ta importante pa reconoce e sintomanan y tuma accion mesora. Esaki no ta algo pa warda pa e siguiente dia.
