Den fin di siman Dr. Guaicaipuro Jimenez Presidente di Aruba Taekwondo Bond ARTBO a bay den entrevista cu Jenny Loefstok di Radio Galactica pa e programa di Cara Cara cu Deporte hunto cu e atletanan di Train Hard Fight Smart di Brazil Taekwondo Stichting.
Dr. Guaicaipuro Jimenez tabata masha contento di por a forma parti un rato di e programa di Jenny Loefstok pa asina splica e pueblo un tiki mas di Taekwondo y den cua direccion Aruba Taekwondo Bond ta bayendo cu tur e atletanan cu ta representa Aruba na eventonan internacional. Awor aki e team di Train Hard Fight Smart a bolbe for di Korea y a logra 4 medaya. Tur esaki ta parti di e preparacion pa e Pan Americano, pasobra Záhyon Klabér a clasifica for di aña 2016 na Port Land na Merca na e Presidents Cup. Na e Pan Americano di Cadet y Junior Aruba ta bay tin 4 participante cu lo bay representa Aruba. Dr. Guaicaipuro Jimenez a splica cu tur e biahenan cu e team di Train Hard Fight Smart ta logra haci, ta bin for di fondonan cu ta wordo recauda door di car wash, BBQ y bendemento di calender. Asina e team di Train Hard Fight Smart ta logra yega na fondo y ta biaha pa representa Aruba.
Jenny Loefstok tabata tin e honor di haci algun pregunta na e dos medayistanan di Oro na Korea, Záhyon Klabér y Jourdé Klabér. Jenny Loefstok a haci nan un strik vraag pa mira kiko nan lo scoge, nan amiga of nan deporte? Dr. Guaicaipuro Jimenez a splica tambe cu ARTBO tin su plan di 2020 caba y cu nan ta trahando duro ariba esaki, pero tur cos ta draai rond di placa, sin e parti financiero lo bo no por yega bo meta. Pa por yega na un ranking mundial un atleta lo mester biaha pa asina participa na diferente eventonan di ranking cu tin su peso di placa.
