Dowers na Bikker: Si Bo kier drecha mundo, cuminsa na Bo mes!

“E no ta digno di un Minister di Husticia cu ta bin den Parlamento y simplemente gaña cu el a contesta mayoria di e preguntanan, siendo cu por mustra cu tin un lista masha largo di preguntanan cu a keda sin contesta. Por a bisa cu no tabatin suficiente tempo, esey ta Bo scogencia pa entrega e presupuesto lat, nos a haci hopi pregunta, Boso a manera keda descepciona cu a bin tanto pregunta y cu awor no por formula contesta”, asina mr. Drs. Arthur Dowers, miembro di Parlamento di AVP a duna di conoce awe durante e reunion di Presupuesto 2018, tumando luga den Parlamento.

“Mi ta ripara cu e Gobierno nobo aki ta trahando comosifuera ta den oposicion nan ta. Nan no sa kico nan ta haciendo. E liña di maneho no tin, pasobra TUR cos cu e Minister aki a bini cune, cu excepcion cu algun cos futuristico cu el a menciona, tur otro cos ta proyectonan cu nos a laga atras. El a critica nos den pasado y awe e ta haciendo literalmente locual nos ta haciendo”, segun Parlamentario Arthur Dowers.

“E triki cu el a uza aki, pa keda sin contesta y gaña Parlamento, gana tempo, pasobra e sa cu den di dos rond Parlamentarionan tin menos tempo pa haci pregunta, ta spera cu no ta e mesun triki asina e tin pensa di uza den maneho di su departamentonan”, asina ex Minister Dowers a termina bisando.