Un doño di auto buscando su auto horta e anochi anterior a topa cu esaki tambe banda di Jaburibari moviendo. El a yama Polis mesora.
Diasabra anochi el a bay bishita un conocir na Piedra Plat y ora cu el a caba cu e bishita a ripara cu su auto no tabata tey mas. E auto no ta start cu yabi.
E auto ta start abou banda di e switch pero mester maniobra pa start e auto. E ladron si a logra. El a move cu e auto henter marduga. Hasta a dal e auto cierto caminda.
E doño no a give up y a subi caya te cu el a topa e auto coriendo di Jaburibari pa Tamarijn. El a sigui e auto mientras Polis tabata na caminda. E auto a logra den Tamarijn drenta un cura di cas unda tin un BodyShop. Eynan el a para y Polis a yega gara e ladron na e adres ey.
Parce el a bay pa bende e auto. E doño tambe a yega y parce e ladron a reconoce e doño di e auto mesora. E doño di e auto conoce e barrio y pesey e conoce e ladron cu ta un tal R.L. conoci di Polis.
E ladron kier a splica e doño cu ta yuda e kier a yude cu e auto. E splicacion di e ladron no a yuda pa Polis keda sin pone na boei. E departamento di K9 y tambe Joyriding a presenta na e adres. Eynan a haci investigacion y confisca e auto. Dogcatcher a presenta y bay cu e sospechoso R.L. warda.
