Nos tur por corda kico a pasa dia 27 di Juli, ora cu un vuelo di Southwest Airlines, a baha na Aruba y cu aeropuerto Reina Beatrix tabata riba un alerta general. Esaki ta pasobra supuestamente un hende a haya un “barfbag” cu e palabranan “bomb” skirbi. Esaki sigur a causa un consternacion riba nos isla, cu a haci cu autoridadnan di mas halto a presenta na e sitio y a evacua, manera cu e avion a baha, e pasaheronan den gate A y B. Despues di algun ora, a sali den medionan local, cu dos dama a wordo deteni, pa ta presuntamente envolvi cu esaki.
Awo, un di e damanan, Jennifer Jones, kende ta un docente di Washington DC, a papia cu prensa y a conta su banda di medaya.
E tabata tin un entrevista cu e medio NBC Washington, el a conta cu e y su amiga a wordo deteni na Aruba, pa mas cu 24 ora, despues cu un hende a haya un nota den un baño di avion cu a bisa “bomb.”
“Mi a keda hororisa. Ta e cos di mas terorifico cu a yega di sosode cumi den mi bida,” e docente, Jennifer Jones, a bisa.
“Nos a wordo wanta abordo,” el a bisa. “Y mi mester a mira esey riba television. Nos a wordo literalmente wanta eyriba. Y ningun hende no tabata sa unda nos tabata. Ningun hende a tende di nos.”
Jones y su amiga, Derna Dickson, tabata di vakantie ora cu un hende lo a skirbi un aparente menasa di bom riba un “barfbag” (saco di saca) y a lage den baño riba un avion di Southwest Airlines, riba dia 27 di Juli.
Pilotonan na mando di e Vuelo 1630 for di Orlando pa Aruba, a declara un emergencia poco despues di a baha cu un “menasa potencial di siguridad”, e aerolinea a bisa.
Jones y Dickson tabata entre e pasaheronan cu a wordo hinca den un shuttle rondona pa autoridad, manera cu e video di celular cu Jones a tuma a mustra.
Despues, “aparentemente un hende a punta dede riba dje, bisando cu e tabata e ultimo hende pa uza e baño,” Jones a bisa.
Jones y Dickson a wordo separa pa interogacion y a hincanan den celnan separa.
Nan a wordo apunta na un abogado na Aruba, pero no tabata permiti pa yama nan famia of e embahada di Merca, nan a bisa. Nan a wordo describi den medionan local como sospechosonan criminal, y nan potret a wordo publica.
Despues di 26 ora di detencion, nan a wordo laga den libertad sin wordo acusa.
News4 a purba di alcansa autoridad na Aruba pa comentario, pero nan no tabata disponibel.
Southwest Airlines a confirma e incidente y a bisa cu autoridadnan local a tuma over e investigacion.
“Nos a coopera cu autoridadnan local den e investigacion y no por comenta mas,” un vocero di e compania a bisa.
Riba diabierna, e pareha a tira un bista riba e documentonan legal, cual nan no por a lesa: nan tabata skirbi na Hulandes. E pareha a bisa cu tin un obstaculo mayor di idioma den nan odisea.
“Nada di esaki tin sentido,” Dickson a bisa.
“Nunca mas mi lo bolbe Aruba,” Jones a bisa, kende a yega di bin cuater biaha. “Y mi gusta Aruba. E luga ta bunita. E hendenan ta bunita. Pero pa loke ta trata e ley, ta for di su luga.”
