Gobiernu di Kòrsou, pa ta mas spesífiko Minister Alcala-Walle a ninga di duna djaluna 30 di aprel, komo un dia liber di skol. Ta asina ku dia 1 di mei ta selebrá dia di Obrero i esaki ta kai riba un djamars i nos tur sa ku kompanianan grandi i tambe gobiernu ora un dia liber ta kai riba un djamars ta brinda oportunidat na empleadonan pa nan por tuma loke nos ta yama na hulandes “verplichte snipperdag” riba djaluna pa asina por tin un fin di siman largu.
Mirando ku djaluna dia 30 di aprel ta kai mei mei di final di un wikènt i ku djamars lo selebrá dia di obrero ta inkonsebibel ku Gobiernu no ta konsiderá di duna e dia aki liber.
Frakshon di MFK a wòrdu aserka pa diferente maestro i mayornan, relashoná ku e desishon aki di Minister Alcala-Walle i ku nan no ta komprondé ta dikon e Minister no por a dekretá dia 30 próksimo komo un dia liber di skol. Ta opvio ku maestronan na gran eskala lo purba haña liber e djaluna aki òf mayornan lo hasi uso di 1 di e 5 dianan ku nan yunan por falta skol i asina probechá e wikènt largu. E chèns ta grandi ku bankinan di skolnan lo ta bashí e dia aki.
Banda di esei maestro i muchanan ta bin di un fin di siman kaminda djabièrnè dia 27 ta selebrashon di dia di rei i den praktiká e djaluna dia 30 lo no ta un dia eskolar produktivo. Esaki ta loke diferente maestronan di skol a informá nos i nan to ta komprondé ta dikon Minister Alacala-Walle ta para ariba ku e dia mester ta un dia eskolar normal.
Frakshon di MFK ta sostené e pensamentu di e maestronan di skol i ta hasi un apelashon riba Minister di Alcala-Walle i Gabinete Rhuggenaath pa rekonsiderá nan desishon i brinda na e maestro i muchanan e oportunidat pa por disfrutá di un fin di siman largu meskos ku otro mayornan ku si lo bai tin un “verplichte snipperdag”.
