E DJ Sueco Avicii, kende en realidad yama Tim Bergling, a fayece na edad di 28 aña diabierna, dia 20 di April, segun su publicista a confirma.
“Cu profundo pena nos ta anuncia e perdida di Tim Bergling, tambe conoci como Avicii,” su publicista Diana Baron a bisa den un declaracion. “El a wordo haya morto na Mucat, Oman diabierna atardi, ora local, dia 20 di April. Su famia ta totalmente kibra y nos ta pidi tur hende pa por fabor respeta nan necesidad pa privacidad na e momentonan dificil aki. No lo bay tin mas declaracion.” Esaki segun e revista virtual di musica, Billboard.
Bergling a cuminsa produciendo musica den Laidback Luke Forum na final di aña 2000, unda cu DJ y productornan ta post nan musica y ta busca feeback di publico. Na 2011, el a bin fuerte p’adilanti cu un audiencia internacional cu e house track progresivo “Levels”, cu a hit number 1 na su pais natal Suecia y tambe riba e US Billboard Dance Club songs chart – y unda cu el a bira un nominado pa un Grammy. Su collab cu David Guetta na 2012 “Sunshine”, a pone como un nominado pa un Grammy tambe y den e mesun aña, el a bira e prome electronic artist pa ta un headliner den Radio City Music Hall na New York.
Na 2013, Avicii a saca su debut studio album, True, cu e hit internacional masico “Wake Me Up!”, hunto cu Aloe Blacc. Combinando EDM, folk y country music, e cancion a bira un hit number 1 den hopi pais y a escala pa number 4 riba e Hot 100 di Billboard. Su di dos album, Stories, a drop na 2015 y a ilustra vocalnan di Chris Martin, Wyclef Jean, Robbie Williams, Matisyahu, Brandon Flowers, Gavin DeGraw y mucho mas. E EP Avici (01) a sali na Augustus 2017 y tabata un colaboracion cu Rita Ora cu e cancion “Lonely Together”.
E factornan di salud di Avicii tabata conoci na publico pa varios aña prome cu su morto. E tabata sufri di pancreatitis agudo, como parti na bebemento excesivo. Na 2014, e mester a cancela varios show, pa asina e por recupera despues di a remove su galblaas y apendix.
Eventualmente, el a dicidi pa retira for di touring.
“P’ami e tabata algo cu mi mester a haci pa mi salud,” Bergling a conta The Hollywood Reporter na 2016. “E escena no tabata p’ami. No tabata e shownan ni e musica. Semper tabata otro cos cu tabata rond di dje cu nunca tabata natural p’ami. Tur otro cos ta parti pa ta un artista. Mi ta mas un persona introverti en general. Semper e tabata duro p’ami. Mi a tuma mucho energia negativo, mi ta pensa.”
