Director Joel Rajnherc: Plannan pa un Imsan expandi ta andando

E plannan di proyecto di Imsan ta andando. A papia cu dr. Joel Rajnherc, director, kende ta conta riba e proyecto y con satisfecho nan ta.

El a splica cu for di aña pasa, mas definitivamente a bin na bista, na kico e desaroyonan dentro di Imsan ta bay ta. E masterplan, manera cu ta wordo yama, ta consisti di haci e localidad aki den e proximo temporada, un instituto cu ta duna servicio di specialisacion riba tur e malesanan cronico cu bo no por transmiti (NCD). Esey ta nifica cu nan lo ta un instituto primariamente y den prome instante pa duna tratamento den dia, un dagbehandeling instituut.

Kico ta papiando di dje

Ta papiando di tur e malesanan cu ta bin a base di nos mal custumbernan, nos one happy livingstyle, cu no ta esun di mas saludabel. Esey ta nifica cu e obesidad cu ta duna e problemanan di diabetici cu ta duna problemanan di presion halto, problemanan di riñon, problemanan cu por yega na dialyse, problemanan di wowo y tambe cu ta duna problema na e asociacion, tumando luga mas y mas na Aruba, e aumento di problemanan di cancer. Kier bira un centro di oncologia, specialisa pa trata nos hendenan na Aruba mes y cu no ta bay ta necesario mas pa manda hende afo pa tratamento, por ehempel di radio terapia. Esey ta un di e pilarnan di e tratamentonan di e pashentnan cu cancer y lo tin esey na Aruba. Esey ta bay scapa cu aproximadamente 150 pa 200 pashent anualmente tin cu bay den exterior y nan por keda na Aruba mes.

Tur e desaroyonan aki, ta haciendo hunto cu nan partner, cu ta Baptist Health of South Florida y ta yuda y guia, no solamente den construccion di e edificionan cu mester y cu e ampliacion di e servicionan, pero nan ta yuda den educa e personal y tur e personal, no solamente e dokter y enfermeronan, pero tambe e recepcionistanan, e hendenan cu ta traha como security. Tur hende ta haya un upgrading den nan educacion pa nan sa con pa yuda un pashent. Ora un pashent wak di leu caba e edificio di Imsan, ya nan mester haya e alivio cu nan por bisa cu eynan nan ta bay yuda nan, ta bay bira miho. Esey ta e meta y e lema cu Imsan ta buscando na Imsan. Pa yega na e status cu nan tin, un JCI Accreditation. Nan tin un nivel di servicio cu nan ta ofrece pashent cu ta di un calidad extremadamente halto, no solamente pa e pashentnan di San Nicolas, pero pa henter e isla.

Duracion

Dr. Rajnherc a sigui splica cu nan ta hopi leu. E programa aki a cuminsa aproximadamente na 2011/12, ora e prome relacion cu Baptist Health a cuminsa. Ta na e momento aki hopi leu den e proceso. E financiamento pa e masterplan cu ta bay costa rond di 60 miyon florin y esey ta inclui no solamente e construccion. Esey ta inclui tur ekipo nobo y no segunda mano. E training di tur e personal cu tin ta inclui den e suma eynan.Con leu Financiamente ta afgerond. A firma y esey ta cla. E ta un hecho caba.

Unda nan ta awo

Nan a caba di entrega na DOW e papelnan necesario, e dibuhonan necesario pa haya permiso pa bay haci e construccion y esey awo ta wardando e permisonan pa nan por bay cuminsa. Entre tanto ta sigui cu Baptist y nan ta desaroyando tambe e bestek pa bay haci un destaho publico, manera ta prescribi den ley y esey ta spera cu tur e papelnan ey ta cla den e prome siman di September pa por bay riba mercado pa haci e aanbesteding. Esey ta e situacion actual.

E escogencia cua aparato di radio terapia tambe ta casi rond caba. Tin hopi compromiso riba esey. Tin afspraak pa e construccion di e bunker unda e mashin mester bin. E ta bin como un ampliacion riba e edificio. E lo bin net pafo di e edificio. Pesey e mester di un permiso special di DOW. Ta bin un planta electrico nobo, unda cu e mecanica di e hospital nobo lo bay ta aden. Tambe mester di un permiso special. Tambe ta bin un extra lift cu tambe ta bay ta net pafo di e edificio pa transporta pashent y e bishitantenan for di piso abao pa e prome piso.