Dimas: Pronto e problema di control riba animeermeisjenan ta tras di lomba

SaniBar tin un preocupacion relaciona cu e permiso di e animeermeisjenan. Nan ta bisa cu e ultimo lunanan e tabata un problema. Directora di Dimas, Kathy Ruiz-Paskel, ta splica cu e tambe a tuma nota di e situacion cu tabata tin.

E ta un preocupacion cu ta conoci na Dimas. Ta trahando di basta aña hopi di cerca cu e barnan y e asociacion di barnan pa e parti di permiso pa e personanan cu ta eherce un trabao cerca nan. Nan ta un cliente na Dimas cu sigur nan conoce y sigur nan ta trata nan semanalmente.

Segun Ruiz-Paskel, desde cu a cuminsa cu e sistema nobo Serca, a haya algun reto pa duna nan e permiso di tres luna, cual cada persona ta haya maximalmente ora cu nan drenta, den e sentido cu nan ta hay’e for di fecha di peticion. Normalmente ta duna nan desde for di e fecha cu nan ta drenta cu e VTA. Ta un problema cu ta conoci no solamente na Dimas, cerca e barnan, pero tambe na Warda nos Costa. Nan ta un cliente cu semanalmente ta na Dimas, pidiendo si nan mester permiso pa personanan cu ta bin eherce nan trabao cerca nan.

DIMAS a keda cla cu e problema di permiso pa damitanan di Bar na San Nicolas

DIMAS a keda cla cu e problema di permiso pa damitanan di Bar na San Nicolas

Posted by 24ora on Monday, August 13, 2018

Mientras tanto Dimas ta trahando riba e parti tecnico, cual por bisa cu ta avansa. Den curso di otro siman caba e parti ey di problema ta tras di lomba y cu e barnan por haya bek locual cu nan ta custuma di haya den e añanan anterior, cual ta e permiso di tres luna maximo pa cada persona cu ta traha cerca nan.

No lo ta problema mas

Awor aki Dimas ta den comunicacion estrecho cu e barnan. Tambe nan tin comunicacion cu Warda nos Costa, pa evita cu esaki lo bay ripiti. Warda nos Costa riba su mes tambe tin acceso na nan sistema. Nan tambe por tuma nota ken tin aplicacion, kendenan ta legal. Te ki tempo e permiso ta valido. Dimas a provee e departamento cu tablet pa nan haci’e mobil. Si nan ta riba nan controlnan rutinario, unda cu nan ta haci control riba si e companianan ta den cumplimento cu leynan di admision, nan por drenta den e sistema di Dimas 24/7, drenta aden y berigua su e personanan en cuestion ta bezig ta controla, si nan tin un status legal si of no.