DIMAS no a otorga ni un “Asilo Politico”

Diaranson henter dia tabatin rumor coriendo rond cu DIMAS ta partiendo permiso bou di “Asilo Politico”. E rumor tabata asina insistente cu varios stranhero a core bay oficina di DIMAS pa “purba nan suerte”. E realidad sinembargo ta diferente!

No ta conoci si ta via medionan di comunicacion of via rednan social a start e rumor cu a bay biba un bida riba su mes. Nos fuentenan ta indica cu peticion pa Asilo Politico ta mara na tratadonan internacional cu Aruba mester atene na dje. Pero den e tratado ta stipula claramente e condicionnan y rekesito cu e aplicante mester cumpli cune pa por bin na remarke pa un “status” asina.

Te dia di awe, Gobierno (anterior y esun actual) no a otorga ni un (1) permiso bou di Asilo Politico. Den pasado de bez en cuando tabata drenta un peticion. Ultimo lunanan e cantidad di aplicacionnan a crece for di proporcion. Suficiente cu ta evaluando un ahustacion den e forma di procesa y acepta aplicacion.

Locual ta sosodiendo ta cu e procedura ta masha na fabor di e aplicante. Mester indica cu bo ta bou menasa y no por regresa Bo pais, como miedo pa persecucion politico. Na momento cu tuma e aplicacion, e aplicante por permanece aki y por traha trankilamente, te ora tuma un decision riba e aplicacion. Despues cu nan nenga Bo, ainda e aplicante por pidi pa un reevaluacion. Ta mustra cu mas y mas stranhero, mayoria procedente di Venezuela ta uzando e procedura aki pa legalisa nan mes.