Diferencia enorme den sushedad entre paradanan

Polis di Bario, Klaas Nijhoff, a keda sorprendi di mira e diferencia grandi cu ta existi den comportacion di publico canto di caminda, comprarando e Parada di Luz diasabra anochi cu e Parada di Mucha na San Nicolas di diadomingo atardi. Manera ta conoci, Polis di Bario, City Inspector y Serlimar ta combina esfuerso pa haci e ruta limpi despues di cada parada di carnaval. Ta un grupo cu ta traha incansabel, haciendo un trabou hopi biaha bou circunstancianan dificil.

“Si mira awe despues di e parada di mucha na San Nicolas, por deduci cu e ta mustra masha bunita, hendenan ta tene nan mes na regla y ta deposita nan sushi den saco of den e barinan di sushi disponibel. Pero si compara ayeranochi na Lighting Parade, ta increibel asina tanto glas, cups y tur e sushedad cu ta keda benta atras”, asina e Polis Hulandes a duna nos di conoce awenochi despues di a caba cu e trabounan na San Nicolas.

E Polis a conta cu diadomingo marduga despues di e parada di luz na Oranjestad, nan a traha pa mas cu 8 ora largo pa haci e cayanan limpi. Esey ta inclui e ruta completo, pues for di Caya Milio Croes te cu final di e parada na altura di e edificio unda antes tabata DOW.

Pa loke ta e parada di mucha na San Nicolas awe, e Polis di Bario a calcula cu den 3 ora, maximo 4 ora nan a keda cla cu e trabou. Pues hopi mas lihe compara cu e otro paradanan. Esaki ta bin tambe pasobra e publico canto di caminda ta laga menos sushi atras y ta hopi mas cooperativo den laga tur cos bunita asina den saco bon cera y mara.

Polis Klaas Nijhoff a finalisa pidiendo comunidad di Aruba pa ta mas consciente di nos medio ambiente. Tene cuenta cu e sushi cu Bo ta produci durante e oranan cu Bo ta disfrutando di carnaval, pa bent’e den bari di sushi of laga tur cos atras canto di caminda den saconan cera y Serlimar mes lo pasa piki nan y benta nan den trucknan di sushi.

Na final e Polis a expresa su palabranan di aprecio y hopi gradicimento pa tur esunnan cu ta traha duro, oranan largo, pa haci nos cayanan limpi despues di cada parada di carnaval. El a sigura cu e trabou no ta facil, hopi biaha publico no ta coopera, pero asina mes e trahadonan ta haci tur esfuerso pa e cayanan keda netchi bek.