Dialuna awor dia 9 di april ta tuma luga e reunion general di Sindicato di Polis Aruba, SPA na nan sede na Club POVA na Santa Cruz. Ey lo mester vota riba e mocion di Omar de Kort, cu ta pidi retiro inmediato di henter e directiva actual di SPA.Edgar Maduro, kende awor ta Presidente di SPA, ta yegando apenas 1 aña na poder, despues di a tuma over di Juancho Gomez. Sinembargo, miembronan tin problema di su decisionnan cu e ta tuma, sin consulta cu su base, pues cu su miembronan.
Omar de Kort no ta un desconoci den SPA. El a fungi como Secretario di SPA den e directiva di Miguel Maduro y despues parcialmente cu Guilfred Besaril. De Kort a bira Polis na aña 2001 y a sali traha como Polis uniforma na San Nicolas. Actualmente e tin 14 aña caba trahando na Bureau Forensisch Technische Onderzoeken (BFTO) y tin 4 strepi den funcion di Generalist.
Su vision no ta pa bira Presidente di SPA, pero si pa logra cambionan structural den e organisacion di e sindicato. E ta desea pa aumenta e directiva na 13 miembro, pa tin un of mas representante di tur departamento di Polis. Tambe e lo prefera pa e Presidente NO ta un Polis activo, pa evita presion of malipulacion. Si nan logra baha e directiva, lo opta pa un Presidente nobo, un Polis pensiona.
E puntonan riba agenda ta:1 Adaptacion di e Statutonan di SPA
2 Protocol entre SPA y Minister Andin Bikker (POR)
3 Fecha pa presentacion di APFA relaciona cu areglo di pensioen
4 Crea un comision di caha pa revisa e cifranan anual di SPA
5 Mocion emiti dor di Omar de Kort durante reunion di 20 di februari 2018.
Durante e reunion aki, e actual Presidente di SPA, Edgar Maduro lo mester midi su popularidad ainda den e miembronan di e sindicato, pa sa si e ta keda na cabes of mayoria lo aproba e mocion cu ta exigi su retiro y di su directiva. Parce cu e ambiente den Polis ta dividi entre e mas hobennan y esunnan cu mas aña den e Cuerpo. Ta premira cu lo sigui un campaña feros awor entre e dos forsanan den Polis, pa mira ken lo keda of tuma timon di e sindicato over.
