Diabierna awo TUI ta cuminsa bula Belgica-Aruba

Entrante diabierna awor dia 15 di Juni 2018, TUI Belgium ta cuminsa cu vuelonan saliendo for di Brusellas, cu un stop na Santo Domingo, pasa Aruba y regresa Belgica bek. Lo realisa e vuelo aki cu e avionnan nobo B787-800, conoci como “Dreamliner”. Lo cuminsa bula 1 bes pa siman, riba diabierna. E acuerdo aki ta bira realidad despues di lunanan di negociacion entre TUI y Aruba Airport Authority. Cu e vuelo aki Aruba ta diversifica pa mas mercado Europeo cu no ta solamente Hulanda.

A funda TUI fly Belgium na aña 2003 pero a cuminsa bula na November 2005, operando for di Agadir–Al Massira Airport, Antwerp International Airport, Brussels Airport, Brussels South Charleroi Airport, Liège Airport, Marrakesh Menara Airport y Ostend-Bruges International Airport. Nan flota ta consisti di no menos di 34 avion, ta bula pa 180 destinacion y tin nan oficina principal na Zaventem, na Belgica. E compania ta incorpora como TUI fly Belgium y den pasado tabata conoci como “Jetairfly”. E ta un subsidiario di TUI Group y ta parti di TUI Airlines, cu conoce otro subsidiarionan manera TUI fly Netherlands na Hulanda, Corsair International na Francia, TUI fly Deutschland na Alemania, TUI Airways na Inglatera y TUI fly Nordic na Suecia.

TUI fly Belgium tin un red di 180 ruta pa mas di 100 diferente aeropuerto den Mediterranean, Red Sea, Caribe, Canary Islands, Cape Verde Islands, Africa y Merca. E aeropuerto base di e aerolinea ta Brussels Airport, aunke cu tin vuelo cu ta sali tambe for di 8 otro base, Brussels South Charleroi Airport, Liege Airport, Ostend-Bruges International Airport, Antwerp Airport, Lille Airport na Francia, Mohammed V International Airport Casablanca y Marrakesh Menara Airport na Morocco.