Dia 22 di Aprel: Dia Internashonal di Mama Tera

Minister di Salú, Medio Ambiente i Naturalesa mr. Suzanne Camelia- Römer ta rekordá komunidat en general ku djadumingu awor dia 22 di aprel ta Dia Internashonal di Mama Tera. Riba e dia aki ta duna atenshon spesial na nos medio ambiente i ta hasi uzo di e oportunidat pa konsientisá komunidat di e importansha di un medio ambiente sano. E dia spesial aki a keda fundá na 1970 pa Gaylord Nelson, ambientalista i senador Merikano e tempu ei. Tur aña tin un tema diferente i e aña aki e tema ta, “Ban kaba ku polushon di plèstik”.


Nos influensha grandi riba medio ambiente ta hasi nos kulpabel p’e polushon aktual. Nos kustumbernan destruktivo den kombinashon ku preshon pa realisá desaroyo ekonómiko, ta resultá den polushon di entre otro nos lamannan ku kantidatnan grandi di plèstik. Den Pasífiko tin hasta “islanan” grandi formá pa tur tipo di plèstik ta drif den laman ya pa hopi aña i ta forma peliger pa hende i bida marino. E problemátika di plèstik den kombinashon ku demas problemanan ambiental por trese futuro di hende i diferente otro organismo riba e tera aki na peliger. Hustamente pa kibra ku e tendensia negativo aki a proklamá dia 22 di aprel komo Dia Internashonal di Mama Tera.

Aki na Kòrsou tambe nos a rekonosé e problemátika di plèstik. Den pasado gobièrnu i supermerkadonan a hasi palabrashonnan ku a resultá den paro di uzo di saku di plèstik pero lamentablemente no ta tur sektor a partisipá. Aktualmente Parlamentario sra. Mc William ta trahando riba un proyekto di lei pa abolí uzo di sakunan di plèstik den tur sektor i sra Camelia Römer ta apoyá e inisiativa aki. Pero no ta sakunan di plèstik so ta forma problema pero dòpinan di plèstik tambe. E último aki por keda hasta algun shen aña den medio ambiente promé ku e degradá kaba na nada. Ta importante pa nos tur tuma akshon dor di hasi uzo di plèstik di forma konsiente, apartá esaki for di otro sushi i semper depositá esaki den bakinan spesial pa kolektá plèstik ku tin na diferente supermerkado.