Di 12 aña di prizon pa libertad inmediato!

Despues di scucha un demanda di 12 aña di prizon incondicional pa e acusacion di transporte di mas cu 300 kilo di cocaina, diabierna mainta e acusado Ruben Dario Rosales Sanchez a scucha Hues declar’e liber! Su Abogado, mr. Chris Lejuez, tabata hopi contento cu Corte a tene na cuenta tur e puntonan cu el a trece dilanti, unda cu a keda demostra cu e pruebanan presenta pa Fiscal di Ministerio Publico no ta condena su cliente. Mas bien e investigacion a laga hopi duda.

Analisando e sentencia por bisa cu e investigacion tabata slordig unda Corte a señala cu diferente punto importante no a wordo investiga.

Dia 5 di december a carga e container aki riba un tereno na Piedra Plat y e carga di e containernan aki (cu mester tabata 5) ta contene schroot. Na momento cu Ruben tabata carga e container, cu aparatonan cu el a huur, tabatin funcionarionan di Aduana presente pa tene e control necesario tanto prome, durante y despues di cargamento di e containernan. Henter e proceso pa manda e containernan aki Hulanda tabata den man di Inter Island Transport Import & Export. Tur e containernan mester a bay Antwerpen y mester a bay abordo di e barco di e compania Perez y Cia Aruba BV.

Prome di carga e containernan dos funcionario a listra esaki. E cargamento a wordo controla door di e funcionarionan hunto cu dos cacho antidroga. Na final a seya cada un di e containernan cu number di registracion y cu candal di Perez Cia Aruba NV poni riba nan. Dia 8 di december e containernan aki a wordo transporta for di Piedra Plat pa Barcadera. E mesun dia a confisca e containernan.

Den e container a bin haya 30 “laadbakportier” di pick-up (15 den cada container), den cual tabatin 285 bloki cu substancia parecido na cocaina. E peso total a resulta 357 kilo di cocaina.

E Douaneronan a declara cu e portanan aki (cu no ta chikito di tamaño) no a wordo hinca den e container durante nan control y nan no a mira nan tampoco durante e control. Nan ta conclui cu despues cu e containernan a wordo seya, a wordo habri atrobe y a hinca e bakinan di pickup den e container.

Nan a reconoce e acusado Ruben como e persona cu riba 6 di december 2017, durante e control, a hinca e schrootnan uzando un forklifter y e tabata guia e proceso di carga e container.

E pregunta, Hues a bisa, ta si e acusado riba of entre e fecha di 6 y 8 di december 2017 a hinca e bakinan di pickup cu cocaina of si e tabata sa cu nan tin cocaina den nan. Na Corte e acusado a declara cu el a carga e containernan cu schroot riba 6 di december riba ordo di e doño di e compania di carga, Krozendijk. Su rol, el a bisa, tabata pa controla e trabou, cu Krozendijk ta e doño di e schrootnan, e no a mira e bakinan di pickup y no a hinca nan den e container y no a huur e containernan tampoco.

E caso a keda cu yen di pregunta pa Corte. A keda den duda si e bakinan di pickup cu cocaina a wordo hinca den e containernan dia 6 di december of entre e fecha ey y ora cu nan a wordo habri door di investigadonan dia 8 di december, si a pone seyo di Douane nobo despues bek riba nan. No por deduci nada di esaki for di e dossier di e caso. Corte a reclama cu den e dossier no tin potret of procesverbaal pa loke ta e numbernan di registracion di e seyonan di Aduana ora cu a kibra e seyonan aki dia 8 di december. Un comparacion di e numbernan di registro di e seyonan di Aduana riba 6 y 8 di december lo por a demostra si a manipula cu e seyonan aki.

Asina tin mas cos cu a bay robes cu a pone Corte conclui cu no a keda proba legalmente ni convincentemente cu e sospechoso aki a haci su mes culpabel na e acusacion di violacion di ley di droga. No por bisa cu no por tabata otro cu ta e acusado aki a hinca e bakinan di pickup cu cocaina den e container; of a laga hinca esakinan of cu e tabata na altura di e contenido. Pa tur e motibonan aki, Hues a declar’e liber y a bay KIA den e bus di CEA pa piki su pertenencianan y por a sali di prizon mesora como un homber liber.