Deurwaardernan so por actua den nomber di Hues

Ultimo dianan a lanta e discusion riba civilnan cu ta eherce trabou di un “Deurwaarder”, aunke nan ta haci esaki den forma ilegal. Ta parce cu specialmente banconan y otro instancianan financiero ta prefera uza un civil, pa menos placa y pa mas lihe, enbes di cana e caminda legal via Corte pa kita propiedad di hende of cobra un cliente cu a faya den su pagonan. Na Aruba nos conoce solamente 4 “Gerechtsdeurwaarder”, cu por actua despues di ricibi autorisacion di Hues, nan ta Linda Morales-Wix, Bernard Roos, Magali Croes y Josefin Locadia.

E Gerechtsdeurwaarder ta un empleado publico, encarga cu tareanan mara na ley y podernan asigna na dje. Banda di e deurwaarder civil, tambe nos conoce e “Belastingdeurwaarder” cu ta traha directamente pa Departamento di Impuesto Aruba (DIMP).

Un Deurwaarder ta encarga specialmente cu entrega “dagvaarding” of tambe convocacion y otro documentonan oficial y legal, perteneciendo na proceduranan legal di Corte of den un caso specifico. E ta encarga tambe pa entrega y publica anuncionan di Corte. Banda di su tareanan na Corte, e Deurwaarder ta encarga cu pone beslag, pa saca tur propiedad for di edificionan den beslag, benta na findishi, y tur otro asunto similar haci cu un titulo legal for di Corte. E ta e wowo legal tambe durante un benta publico di propiedadnan, tambe si e ta boluntario.

Ningun caso ta inicia te ora cu un Deurwaarder presenta pa convoca un caso na e partidonan, asina ta referi na un “dagvaarding”. Esun cu ta cuminsa e caso ta bay Corte y pidi pa inicia e caso. Asina Corte, via e Deurwaarder, ta informa e otro partido(nan) di e caso. Na Aruba anualmente ta tuma luga entre 2500 pa 3000 caso y tur di nan ta cuminsa cu e famoso “dagvaarding” entrega personalmente dor di e Deurwaarder. E idea di entrega e citacion den man di e otro partido, ta pa garantisa cu e persona ta existi y e adres ta existi y ta un garantia cu e ciudadano sa cu lo tin un caso contra dje.

Ora referi na entrega di documentonan oficial, mester pensa riba acuerdonan cu un interes financiero grandi, hopi biaha ta opta pa haci’e oficial via un deurwaarder enbes di un “carta sigura” via Post of courier.

Un otro trabou di Deurwaarder ta pa comunica e sentencia di Corte, dor di entrega e sentencia na e partidonan envolvi. Na momento di entrega y e partido firma pe, ta considera cu a “beteken” e sentencia. Mirando cu ta asuntonan legal, hopi biaha ta uza e fecha di “betekenis” como inicio di e periodo pa apela of protesta contra e decision di Corte. Ta sali for di e punto di bista cu e dia ey e partido envolvi a cera conoci cu decision di Hues y asina e periodo oficial ta drenta na vigor.

Mescos cu un Notario, un Deurwaarder tambe por traha un “akte” di locual el a constata. E acto aki ta conta como prueba legal si despues bin un disputa den e hechonan. Por ehempel, ora tira beslag riba propiedadnan, e Deurwaarder semper lo traha un proces-verbaal den un akte.

Asina tin varios otro momento cu un Deurwaarder ta haya poder, por ehempel ora Hues kibra un acuerdo di huur, e proceso di ruim op e oficina, cas of apartament por sosode solamente den presencia di un Deurwaarder.

Un Deurwaarder ta eherce tambe un lista largo di trabounan cu no ta cay bou su funcion di “ambtenaar”. Nan ta eherce trabou di “incasso”, ta duna conseho huridico, por yuda concipia “algemene voorwaarden” y mas.

E splicacion aki mester ta cla pa tur hende cu tur trabou cu un Deurwaarder ta eherce, ta den cuadro di ley y cu poder di un Hues. Mas bien e ta cumpli cu ordo di Corte, pesey den e casonan aki e partidonan mester bay Hues prome y e ultimo aki lo ordena un Deurwaarder pa activa mesora. E sistema cu ultimo añanan institutonan financiero ta salta e parti legal y ta bay “riba nan mes” pa cobra hende, drenta cura di cas pa coy auto pa banco of hasta riba caya, TA CONTRA LEY!