Siman pasa diamars-diaranson no tabatin barco di carga for di Miami. E barco “Ipanema” di e compania King Ocean, ta e unico cu ta trece carga for di Miami pa Aruba. E ta sali tur diasabra cu mas o menos 250 pa 300 container abordo. E ta yega Aruba prome, sigui pa Corsou y despues Miami atrobe. Nan sa uza otro barco cu ta pasa Venezuela tambe den e iterinario. Sinembargo e siman aki, pa un fayo cu motor, e barco Ipanema no a yega.
Parce cu durante pleno biahe, e barco a hay’e cu retonan tecnico pa cual el a tira anker wardando ayudo. A lastra e barco pa Jamaica y eynan a dreche. Si tur cos ta bon, den fin di siman a descarga y carga otro barco cu lo a sali atrobe pa Aruba y como tal e siman aki lo tin 2 barco di carga di Merca, pues esun di siman pasa yegando for di Jamaica y esun cu a sali diasabra for di Miami, segun e iterinario normal.
Consecuentemente, e siman cu a pasa aki Aruba a keda sin carga for di Miami, cu ta representa mayoria carga cu ta yega Aruba. Den supermercadonan a nota borchinan indicando cu e container di fruta y berdura no a yega, lagando nos isla den un scarsedad grandi debi cu ya tin reto pa haya carga for di Venezuela caba. No ta supermercadonan so, pasobra ken cu tabata sperando carga di Miami no a haya nada.
King Ocean ta bishitando Aruba pa hopi aña caba y e ta e unico awor di Miami. Tin mas o menos 3 compania cu ta comparti espacio riba su barco, den forma di un “Vessel Sharing Agreement”.
“E no ta algo normal y den mi 30 añanan den e negoshi aki, esaki ta e di 2 biaha cu algo asina ta sosode”, asina Stephen Daal, kende ta un comerciante masha popular den e industria di carga y logistica di Aruba. “Mi ta corda net den tempo di 9/11 tambe algo similar a sosode cu nos a keda un siman sin carga y esaki ta di dos. Pues despues di 17 aña. E barco aki ta mescos holoshi, e no sa faya”.
