Irma Heronimo di Bar Coco Loco na Eagle Beach ta canando diferente caminda legal, gastando placa na abogado etc. El a splica cu ora cu el a haya e kiosco tabata tin hopi defecto. Un di nan tabata e douche.
E no por uz’e optimalmente. El a manda mas cu 12 carta, ningun biaha a haya un contesta. El a haya su mes obliga di traha un douche profesional. E turista ta sali for di beach y kier douche su curpa prome cu e subi un taxi. E taxistanan, si e turista no ta limpi no ta tuma nan.
Tourbusnan igual. El a haya su mes ta traha un douche profesional pa por duna e servicio. E tabata tin un reunion diabierna. Aparentemente un di e huristanan a bisa cu e baño no a wordo traha pa esun cu ta bay beach. A puntra pa ken a traha e baño. A bisa cu e baño a wordo traha pa esnan cu ta uza e beach.
Otro defecto tabata e cushina, cual ta uno hopi chikito. Na prome instante el a pidi un restaurant vergunning B. Despues di un luna a wordo yama pa un personal di DBZ y a bisa cu pa loke e ta bay bende, mester pidi un vergunning A. Riba nan conseho el a pidi un vergunning A. E mester a haci varios cambio. Ora cu a bin keur e luga, esaki a wordo afgekeurd. E luga no a wordo traha cu meta pa bende cuminda. Pero den e contract ta para cu e por bebe cuminda, cual ta hopi amplio. Esey no kiermen bende pastechi of croket. E por ta hopi cos.
Heronimo a manda un carta e tempo ey pa DIP y DOW. E mesun dia el a haya dos funcionario di DOW. E persona a indik’e cu ta algo masha chikito. Por ta un meter di hanchura y dos meter y pico di largura. Por cera riba e mesun vloer di un material cu ta contra candela y e ora bo ta cera bo meter cuadra. Higienische Dienst a bin wak’e y tabata OK. Unico cos cu falta ta un mapa, cual Heronimo a haya un shock. El a laga traha un mapa y ora cu a entreg’e, nan a bise cu e no por dien’e in, sino DIP. Ora cu a bay DIP, e ta wordo manda di cashi pa muraya. Awor aki e mester kibra e pida espacio eynan cu ta chikito. Unico cos cu e no ta di acuerdo pakico tin cu kibra e pida chikito ey, mientras cu ta bay na e beach bar banda di Surfside, a haci un expansion masha grandi mes. El a keda un baby banda di nan y nada no a wordo haci. Ta bay na uno na Arashi y tin un dak grandi cu a wordo traha y nada no a wordo haci. Heronimo cu a haci algo chikito, tin cu kibra. E cos aki ta pone pensa den otro direccion. E no ta simplemente e kiosco.
For di tempo cu e la haya e kiosco el a haya problema. Tur cos a cuminsa na Februari e aña aki, cual el a haya su mes ta gasta hopi placa den gastonan di corte, abogado. El a perde caso cual tabata un kortgeding. E ta hopi bon documenta el a menciona si. E ta analisando si e ta bay hooge beroep. Semper e tin su cosnan na ordo, e tin su cartanan, e tin hopi filmacion. Tur cos e ta saca potret y filma. E ta wardando e siman aki pa mira kico ta pasa y decision di abogado pa mira kico lo bay haci.
