A kita klem y problemanan financiero na Aruparking a cuminsa

Tin hopi cos ta pasando cu Aruparking y tur hende ta pendiente cu tin falta di espacio den Playa pa para auto, pa motibo di hendenan cu ta para y no ta paga.

Teo Croes, director di Arubus/Arutram y Aruparking, ta splica cu desde cu e klem a wordo kita, a pasa cu a bolbe bek ta loke tabata e tempo ey. Tur trahado ta para bek den e blanco. Tur e meta, e accesibilidad cu tabata tin pa caya grandi, pa e clientenan, a wordo kita.

Awor e clientenan cu tin, ta prefera di bay un luga mas cerca. Normal, nos Arubianonan kier para mas cerca y esey ta loke e meta tabata di Aruparking, pa por tabata tin accesibilidad pa e clientenan di caya. Kitando e klem, no tin sancion. Ley ta keda bisa cu tin di sigui paga, pero no tin un sancion p’e. E hendenan ta violando e ley, pero no tin sancion pe atrobe.

Tabata tin un grupo di comerciante cu a bay haci protesta, nan a wordo complaci, e reglanan a wordo cambia, klem a wordo kita, orarionan a wordo baha, cu a causa cu a hinca Aruparking den problemanan financiero pa cuminsa. Pero tambe e accesibilidad pa caya grandi no tey. E control riba e foutparkeren ta keda. Esey ta yuda hopi den e parti di parkeer riba acera y parti di parkeer den geel.

Croes ta reitera riba e geel, pa tur hende ta bon na altura cu no por para den e vaknan aki. Si para den e geel, e auto ta wordo lastra. Awor aki ta hayando for di basta comerciante y a traha manera un encuesta chikito riba e comerciantenan y mayoria di nan kier e klem bek. Awor aki ta keda na gobierno su decision, e maneho cu nan kier hiba hunto cu e hunta di comisario y directie, ki direccion nan kier bay, si ta bin bek cu e klem. For di prome minister e tempo ey a haya opdracht di bay sinta cu DWJZ pa bin cu un otro ley. A duna un otro propuesta di ley na DWJZ, cual nan a keda warda y te ainda no a haya nada for di gobierno pa sigui cun’e.

Plan di solucion

Croes ta sigui splica cu nan tin plan cu nan a duna gobierno. Uno ta adapta e tarifa, reintroduci e klem y/of bin cu e otro sancion, cu ta bisa cu bo ta haya un boet pega riba e auto. E prome biaha cu viola pa no paga y bo mester bay pag’e. Ora bo page di biaha, esta e mesun dia ta 50. Pero si pasa dia e ta bira 75. Na momento cu haya un di dos multa, ta lastra e auto. E ora tin cu paga tur dos boet, plus towing pa asina haya e auto bek.

Esey ta e parti di e sancion, cual por duna accesibilidad bek na Playa cu tin e vak blanconan atrobe disponibel pa e clientenan cu ta bin den caya.