Sunday, 23 November 2014
Minister Dr. Richard Visser ta anuncia "Ban move Vakantie Kamp 2013" Print E-mail
Sunday, 23 June 2013 18:45
Comparti

front1

Ministerio di Salubridad y Deporte, Aruba Sport Unie, Subsidie Commissie y IBiSA ta organisa “Ban Move Vakantie Kamp 2013”. Esaki ta un tremendo proyecto pa e temporada di vakantie den cual muchanan di entre 8 te cu 14 aña di cada districto por participa. Minister di Salubridad y Deporte Dr. Richard Visser a duna di conoce cu ta un honor pe anuncia "Ban Move Vakantie Kamp".

El a laga sa cu den pasado a organisa un evento pero cu un grupo mas reduci di mucha, pero e aña aki a traha di un manera mas structura y a reorganisa IBiSA cu ASU y ta bay tene un actividad pa no menos di 800 mucha, cu lo participa na e eventonan durante luna di Juli. Cada siman lo tin un grupo di 200 mucha den shete diferente districto. "E hecho cu e campamento ta gratis sin duda ta algo unico. Nunca antes nos a haci’e gratis", asina e mandatario a admiti. Meta di "Ban Move Vakantie Kamp" ta pa duna oportunidad pa e mucha por cera conoci cu mas disciplina di deporte, practik'e y haya interes pa sigui haci actividad fisico of pa pertenece na un organisacion deportivo. Minister Dr. Richard Visser a laga sa cu cada siman e Bus di Salud lo t’ey presente pa duna servicio na e muchanan y tambe na e habitantenan di e bario. E personal di IBiSA lo ta dunando informacion y atendiendo esunnan cu kier haci un chekeo di nan salud. Un luna largo ta bay tin actividadnan pa nos muchanan. Esaki ta bay ta un vakantie caminda e muchanan lo tin yen actividad sano pa realisa, e mandatario a subraya. Cu e Ban Move Kamp ta stimulando e proximo generacion pa ta activo y p’esey kier haci’e asina grandi. “Mi ta gradici IBiSA, mi ta gradici ASU, Subsidie Commissie tambe, tur nos hendenan, tur e boluntarionan, tur e hendenan cu ta bay maneha e kamp aki cu ta bay ta sumamente grandi", e mandatario a bisa. E agenda di e campamento ta cuminsa den e siman di 8 pa 12 di Juli na Sport Centrum San Nicolas for di 8or di mainta pa 1or di merdia. Actividad ta di dialuna pa diahuebs. Lo tin Zumba, Capoeira, jui-jitso, basketball, wega recreativo y dam. Dia 12 lo tin un actividad special saliendo cu bus pa Parke Arikok y Museo. Den e siman di 15 pa 19 di Juli lo tene e evento na Compleho Deportivo Frans Figaroa na Noord for di 8or di mainta pa 1or di merdia. Entre e actividadnan lo tin zumba, beach volleyball, beach futbol, beach tennis, basketball, wega recreativo, pickleball y volleyball. Dia 19 di juli e muchanan lo bishita diferente otro luga den bus. Durante e siman di 21 pa 26 di Juli lo tene e evento na Centro Deportivo Betico Croes na Santa Cruz entre 8or di mainta pa 1or di merdia. Lo tin zumba, basketball, wega recreativo, futbol, volleyball. Dia 26 di Juli e muchanan lo bishita otro luganan den bus. Siman di 29 di Juli pa 2 di Augustus, lo topa cu e muchanan na Compleho Deportivo Yara na Savaneta for di 8or di mainta pa 1or di merdia. Aki tambe lo tin zumba, wega recreativo, futbol, competencia den diferente ramo. Dia 1 di Augustus lo tin actividad na Linear Park cu bicicleta y tambe Atletismo. Dia 2 di Augustus e muchanan lo bishita otro sitionan cu bus. Durante e “Ban Move Vakantie Kamp 2013” lo tin instructornan capacita. E ta completamente GRATIS. Mayornan por inscribi nan yiunan na IBISA Playa of San Nicolas y na e oficina di ASU situa na Centro Deportivo Betico Croes. Pa mas informacion por yama: IBiSA na 582-4987 of 5848903 of Aruba Sport Uni na 585-4071 of 5854067.

gallery1 gallery1 gallery1
gallery1   

Comparti
Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter