Nicole Hoevertsz reconoci como un di e 25 hende muhernan mas influyente di deporte Olimpico internacional

Friday, 15 March 2013 17:33

Aruba 15 maart. Den e publicacion deportivo internacional "Around The Rings", a sali un bunita articulo riba e secretaria general di COA y alabez miembro di Comite Olimpico Internacional, Sra. Nicole Hoevertsz. E articulo ta papia di e Golden 25 Women, reconociendo e 25 hende muhernan mas influyente den Movimento Olimpico mundial.

Cu e publicacion aki, "Around the Rings" kier comparti nan aprecio pa e 25 hende muhernan aki, pero na mes momento ta mustra riba e realidad den cua demasiado poco muher ta activo den dirigencia di deporte mundial. Segun "Around the Rings": "E ausencia di muhernan den posicionnan di liderazgo den deporte ta alarmante. E lista di e Golden 25 Women ta nos intento pa elimina e desigualdad aki."

Di Nicole Hoevertsz "Around the Rings" ta menciona lo siguiente.

"Nicole Hoevertsz ta un pionero (trail-blazer) pa hende muher den dirigencia di deport den e continente Panamericano.

Hoevertsz, 48, a bira e prome hende muher cu a wordo eligi den Comite Ehecutivo di e Organisacion Deportivo Panamericano (ODEPA) na aña 1998. Te ainda e ta un di e poco hende muhernan cu ta miembro di e Comite Ehecutivo aki. Den e organisacion ODEPA, Nicole ta presidente tambe di e Comision Muher y Deporte y ta ocupa e cargo di Canciller, esta e Hefe di Protocol di e organisacion.
Na aña 2006, Hoevertsz a wordo eligi como Miembro di Comite Olimpico Internacional, sirbiendo IOC actualmente den tres diferente comision, cu ta e influyente Comision di Coordinacion pa e Weganan Olimpico Rio 2016, e Comision di Relacionnan Internacional y e Comision di Muher y Deporte.
Como un atleta Olimpico, Hoevertsz a representa Aruba (e tempo ey ainda como parti di Antiyas Hulandes) na e Weganan Olimpico di Los Angeles na 1984 como landador sincroniza.
Un nativo di Aruba, Nicole ta ocupa e puesto di Secretaria General di Comite Olimpico Arubano, COA. Nicole a studia ley y a completa su educacion academico como hurista na Hulanda. Den su carera profesional e la traha como consehero huridico pa Prome Ministro di Aruba, y a traha tambe na e Departamento di Relacionnan Exterior. Actualmente e ta fungi como Secretaris di Conseho di Ministro. Na momento cu e la bira Secretaris interino di Conseho di Ministro na 1994, e tabata e prome hende muher den Reino Hulandes cu a ocupa dicho puesto."