| Rancho la Ponderosa y Aruba Doet ta cla pa e cambio! |
 |
 |
| Monday, 11 March 2013 17:11 | |||
|
Diabierna dia 16 di maart ta e dia cu Rancho La Ponderosa ta bay haya yudansa di e volutarionan di Aruba Doet di locual 10 alumno y dos docente di “het Schakel College” pa yuda crea un cara nobo door di verf e rancho parti pafo! Rancho la Ponderosa ta un rancho di cabay unda muchanan ta tuma les di core paso fino. Y asina nan ta prepara nan mes pa competi den competencia di paso fino. Tin varios competencia pa anja na Aruba mes, entre otro Interpaso pero tambe internacional. Weekend pasa e muchanan di Racho La Ponderosa a competi na e Feria Himno y Bandera 2013, y nan a logra diferente premio.
Durante e anjanan cu a pasa por nota cu Rancho la Ponderosa tambe ta bira conoci di ta e segundo cas di tur e muchanan aki. Asina cu nan ta cla cu tarea di scol e muchanan ta bay Rancho la Ponderosa pa yuda saca cabay, cuida nan, come yerbe cu nan, banjanan of djies dunanan atencion cu e cabaynan gusta masha hopi mes. Tambe e muchanan ta sinja con pa duna les y cada un ta gusta yuda di ta e juffrouw su assistente. E amistad entre tur e muchanan di tur edad ta hopi bon.
E comision di mayor ta hopi gradecido cu Aruba Doet a honra e deseo pa verf e rancho di pafo pa dun’e un cara nobo. Tambe lo bin mesa cu stoel pa muchanan por sinta get together y pa waak les di otro mucha of pa haya les di teoria di cabay. Di e manera aki ta bira mas placentero pa bay rancho y tambe tin luga pa e mayornan sinta waak nan yiu tuma les y pasa un rato ameno.
Aruba Doet a sende e mecha di animo pa asina mas projecto chikito por wordo realisa den futuro. Aunque cu tin varios volentario cu ta bin yuda diabierna awo, semper por yuda mas. Manera e dicho na Hulandes ta bisa “Vele handen maken licht werk” E compania Subway ta apoya e actividad aki 100% y ta ofece pa tur persona cu ta yuda haya un sandwich dushi y saludabel.
Si abo tambe kier yuda e dia aki, por inscribe ainda na Aruba doet of por yama 5924902. E orario mainta ta di 8.00-13.00 y atardi di 2.00 pa 18.30. Bin yuda Rancho La Ponderosa haya un cara nobo!
|
Mustra/Kita e formulario di comentario
