Monday, 24 November 2014
Unistars ta despidi di copa Betico cu cara na laira Print E-mail
Monday, 21 January 2013 15:33
Comparti
DSC_2063
Diahuebs ultimo a cuminsa e quart finalnan di Copa Betico, caminda cu e puma nan di Piedra Plat, SV Britannia mester a topa e Submarino Blau di Pos Chiquito, SV Unistars. Loke mester a bira un “walk in the park” pa Britannia a para bira manera un mal sonjo y e Puma nan mester a lucha te na e ultimo minuut pa logra saca un Victoria di 1-0 riba Unistars.

E Submarino Blau a presenta cu un team hopi compact y bon organiza riba tereno caminda cu e veloz delantero nan di Britannia no por a hanja espacio pa maniobra. Tanto Sebastian Montoya como Marlon Andrea no por a crea e peliger pa por a habri caminda pa gol.

Di otro banda Unistars tawata bai sporadicamente den atake pero tawata hopi peligroso si ora nan yega. E Submarino Blau a junga cu un solo torpedero dilanti, cu tawata Jaisley Boekhoudt y junto cu Karel Croes a trece basta incomodidad pa e defensa di Britannia. Un audiencia basta grandi a sinta dilanti nan television y sigui e wega via canal 49. Un wega cu sigur a trece basta emoshon, hopi sympatia y hasta admirashon pa e jugador nan di Unistars. Un team jong, pero cu un curazon grandi cu a lucha cu alma y cuerpo te na e ultimo minuut. Sigur bo por catagoliza e wega aki como un pelea di “David contra Goliath.” Pero segun e minuut tawata pasa e tawata parce mas un pelea di boxeo di Rocky Balboa.

Despues di 90 minuut ainda e team di Unistars tawata riba pia y bringando contra un team hopi mas superior cu nan, cu hopi mas historia, hopi mas experiencia pero nada di esaki no por a yuda Britannia e anochi aki . Unistars tawata tin contesta pa tur loke Britannia a bin cu ne y na dado momento esaki a trece basta iritashon serca e jugadornan di Britannia. E incapacidad di penetra e defensa di Unistars companja pa e tremendo actuashon di portero Luis Molina a pone cu Britannia a cuminsa desespera y perde pasenshi. Unistars ta probecha di momento di incertitumbre aki y ta cuminsa yega mas serca di e gol di Britannia.

E submarine blau ta crea varios ocashon di gol, y esun mas claro tawata un tiro potente di Jaisley Boekhoudt cu e portero di Britannia Dayron De Cuba mester a luci pa evita cu Unistars por a tuma ventaha. E gol di Britannia ta cai na di 87 minuut. Ora cu tur hende a pensa cu e wega lo caba tabla ta bin un centro inocente pero un fayo den rechaso y e bala ta cai riba pia di Marlon Andrea cu ta avansa riba banda drechi y ta pone un centro cruza caminda cu e joven goleador Sebastian Montoya Escobar ta drenta y ta pusha e bala den net pa e gol di Victoria. Sigur un banjo di awa frieuw riba tur e jugadornan di Unistars.

E submarine blau di Pos Chiquito por mira riba un tremendo actuashon y ta bandona e torneo di Copa Betico Croes cara na laira. Manera nan entrenador Gregory Tromp a bisa, “ Nos ta bai cas satisfecho. E muchanan a haci tur loke nos a pidi di nan y mas. Nos no a gana e wega, pero nos a gana e respet di nos oponente. Y esey ta un Victoria moral cu bo ta keda cu ne full bo bida.” Unistars ta despidi di Copa Betico Croes y awor ta sigui su preparashon pa e comienso di e segunda buelta di Division Uno. Britannia ta avansa pa e semi final nan di Copa Betico y tin cu junga contra La Fama. Un invitashon ta bai na tur e fanaticada di Pos chiquito, Sabana Basora y becindario pa sigui duna apoyo na e team di Unistars .Sigui e soldiers nan di e Submarino blau shelo via facebook riba Unistars Unico. Proximo training lo ta mañan diamars 22 January riba tereno di Estrella contra equipo di Estrella.

Comparti
Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter