Patrick Sydow a sali na e di dos luga den e Campionato Internacional di Tennis na Florida

Friday, 28 December 2012 09:36

E deporte di tennis local na Aruba a haya un empuhe den e fin di siman ultimo ora nos mesun Patrick Sydow a sali na e di dos luga den e Junior Orange Bowl Campionato Internacional di Tennis na Coral Gables, Florida, den e grupo di su edad.

El a perde contra e ganador, Ishay Oliel, for di Israel, 6-3, 6-1, kende a bai cu e trofeo, sigui pa un yamada di telefon for di Israel su prome minister, kende a dun’e pabien riba su prestacion spectacular.

E hungadornan hoben di tennis Oliel y Sydow awo ta haya nan mes den e mesun grupo cu Jimmy Connors, Andy Murray, Jennifer Capriati y Monica Seles, kendenan tur a yega di gana e competencia internacional aki.

Frans Sydow, Patrick su tata orguyoso, ta raporta cu e Junior Orange Bowl Campionato Internacional, conoci desde 2008 como e Dunlop Orange Bowl Campionato Internacional di Tennis, ta un torneo prestigioso di junior tennis, un di solamente cinco cu ta wordo evalua pa e Federacion Internacional di Tennis como “Grade A”. E torneo ta inclui singles y doubles draws di tanto mucha homber como mucha muhe, den ambos categoria di edad di '18 y abou' (bou di 19) y '16 y abou' (bou di 17). Desde 1999, e torneo ta wordo teni tur December na Crandon Park, na Key Biscayne, Florida, atrayendo mas di 1,000 participante for di mas di 75 pais.

“Nos ta hopi orguyoso di Patrick su logro internacional,” Frans Sydow a bisa, “el a traha hopi duro, y nos como mayornan a traha hopi duro banda di dje, pa sosten’e, y permiti’e di desaroya su talentonan. Nos ta spera cu, cu su exito, e scolnan publico na Aruba como tambe e gobierno lo trata di yuda desaroya e muchanan talentoso aki, pa yuda e pais aki lanta campionnan di clase mundial, representando Aruba cu orguyo y talento.”

Patrick Sydow tin 12 aña di edad y ta un studiante di Colegio Arubano. El a nace na Aruba y ta hungando tennis desde e edad di 4 aña, mas tanto cu su tata, kende tambe a hunga tennis durante su añanan di universidad, como un profesional. Patrick ta entrena cu e profesional Argentino Claudio Martinez na e canchanan di golf di Occidental Grand Resort.

Pa informacion adicional tocante e torneo, como tambe reglanan y regulacionnan pa loke ta registracion, bo por bishita www.jrorangebowl.org.