Departamento Labor: Cambio den salario minimo ta retro-activo entrante 1 di Augustus 2017

Tin cambio pa loke ta salario minimo y ta bon pa hay’e for di Departamento di Labor den un forma oficial pa tur hende tuma nota di dje y for di ki dia esaki ta drenta na vigor, kico e ta encera, si ta solamente un tipo di trabao of dos tipo di trabao. Anthony Lee Riviears, kende ta director interino di Departamento di labor, a splica cu e suma di salario minimo pa un empleado cu tin 18 aña di edad of mas, nan ta wordo ahusta entrante dia 1 di Augustus 2017 y e suma lo bay bira Afls. 1711,15 pa luna y tambe ta bay bira 399,10 pa siman pa un empleado di 18 aña of mas cu ta haci trabao domestico den un residencia priva, e salario minimo lo bira e ora 798,30 pa luna y pa e empleado domestico cu ta traha 22 ora of menos pa siman, e suma di salario minimo e ora lo bira 8,90 pa ora. Como consecuencia di e ahustacion di e salario minimo e limite di salario pa aplicacion di ordenansa laboral 2013, tambe lo subi entrante dia 1 di Augustus 2017. E ordenansa laboral 2013 ta e ley cu ta regla e condicionnan di trabao manera entre otro e oranan maximo cu por traha pa dia of pa siman. Por bisa tambe dianan di sosiego, pago di overtime y pago riba dianan di fiesta. Tin cu bisa si cu e ordenansa laboral no ta aplicabel pa tur trahado, pero ta conta solamente pa trahadonan cu ta cay bao di e limite di salario e ora ey.

Nan tin un sorto di calculacion y e ta lo siguiente: e limite di salario nobo lo bira entrante dia 1 di Augustus 2017, e salario minimo, esey ta ongeveer 1711,15 x factor 2.3 y e ora e suma lo bira total 3935,65. Esaki ta encera cu trahadonan cu ta gana un salario di e 3935,65 pa luna, of bo por bisa cu por reken e om den aña cu ta sali 47227,80 pa aña of menos, ta cay bao di e proteccion di e ordenansa laboral. Nan tin e derecho riba tur e condicionnan di trabao stipula den e ley aki.