Telefoon Pa Hubentud ta un Stichting cu ta sali na fabor di nos hubentud y nan trabou no a para pa motibo di e crisis relaciona cu coronavirus.
Shurman Milliard, trahado social na e fundacion aki a splica cu nan fundacion ta trahando pa 20 aña caba den comunidad. Prome cu e crisis a surgi, e fundacion tabata trahando riba un plan pa alcansa mas hoben posibel cu mester di nan ayudo, via yamadanan telefonico of e app 131.
Un bunita proyecto tabata e bishita na diferente entidad y instancianan manera museo, dunando un splicacion riba nan funcionamento y cual programa di television (Telefoon pa Hubentud TV) e hobennan por a siña hopi di dje.
Na momento cu e crisis a cuminsa, no a sinti cu e cantidad di yamadanan a baha. AL contrario, nan a subi y e temanan di preocupacion di e hobennan a bira mas diverso.
E ta haya cu despues di e pandemia charlanan riba temanan manera norma y balornan ta bay haya mas importancia den e situacion nobo. Y tambe lo bay inclui aspectonan manera higiena cu mester inclui den e charlanan. Y manera semper social media y tecnologia ta otro temanan cu semper a interesa hobennan y lo sigui concentra riba nan.
Den e crisis a duna un tayer di Covid-19, unda a suministra informacion specifico pa e hobennan. Nan mester haya un bon splicacion pa no haya nan mes cu trauma, di tur e consecuencianan cu e crisis a trece cu ne cu a impacta nan tambe.
E hobennan por tuma contacto cu e Fundacion entre 2’or y 6’or di atardi. Y por download e app 131, den cual tin tur splicacion. Pero riba nan canal di youtube tambe tin tur informacion necesario.