Dangui Oduber riba Corupcion: Nunca nos a retira carta entrega na Ministerio Publico contra Otmar Oduber

Na varios occasion a tende con Otmar Oduber ta expresa publicamente cu MEP y otronan mas bien a haci show na Ministerio Publico. MEP a purba tilde di corupcion etc. Esaki Otmar Oduber a haci den conferencianan di prensa y na radio tambe.

Na April 2016, parlamentarionan di MEP e tempo ey Dangui Oduber, Xiomara Maduro y tambe Guilfred Besaril a bay na Ministerio Publico pa entrega un documento specifica di cosnan cu nan ta tilda di ta coruptivo contra Otmar Oduber. Lider di MEP Evelyn Croes, Xiomara Maduro y propio Dangui Oduber tabata fulmina contra Otmar Oduber. Acusacionan fuerte entre otro na April 2016 constant cu Otmar Oduber tabata corupto.

Awor despues di tur acusacion MEP y POR a uni. A base di expresionnan haci prome cu eleccion, awe na 2018 Dangui Oduber y Otmar Oduber ta manera ruman di otro. Mirando  e expresionnan recien na varios ocasion di Otmar cu ta show MEP a bay haci na Ministerio Publico, tabata importante di haya reaccion di Dangui Oduber. Diferente persona entrenan hendenan di MEP kier sa con a para cu e denuncia cu MEP a haci contra Otmar Oduber.

E pregunta aki a wordo haci tambe durante conferencia di prensa na minister Dangui Oduber. E reaccion di minister Dangui Oduber tabata cu na April 2016 a entrega un carta na Ministrerio Publico ter kennisneming. Un denuncia no a wordo haci e tempo ey segun e mandatario Dangui Oduber.  Di e tempo ey nan no a tende mas di Ministerio Publico. E informacion cu MEP a retira e carta contra Otmar Oduber na Ministerio Publico no ta berdad. Nan a entrega e carta contra Otmar Oduber y e carta aki a keda na Ministerio Publico. Nos a entrega e carta y esaki a keda registra na Ministerio Publico y nunca nos a retira esaki. Minister Dangui Oduber a bisa cu e carta a keda na Ministerio Publico y ta keda na Ministerio Publico pa mira kiko nan ta haci cu e carta cu MEP a entrega contra Otmar Oduber.