For di Hulanda nos a ricibi e grato noticia cu e hoben Cynthia Lacle a firma cu “Orange Deejays” y awo ta proyecta pa toca festivalnan di musica di mangnitudnan grandi. Cynthia ta naci na Hulanda, pero di mayornan Arubiano y tur su famianan aki na Aruba y na Hulanda ta masha orguyoso di su logronan.
Cynthia ta e prome DJ femenino number 1 di Hulanda. Ya desde 5 aña pasa, Cynthia ta bezig ta toca muziek. Despues di un curso cu el a sigui na Eindhoven, e tabata sa cu e kier haci mas riba tereno di DJ.
Despues di a practica suficiente ora, el a bay orienta riba cua estilo di musica e kier draai. E tabata sinti basta pa Progressive House, ya cu esaki tambe ta e estilo cu e ta draai mas tanto. Na 2016 a participa pa prome baha na un competencia oficial. Aki el a keda na di 17 luga, pero debi cu el a siña di asina hopi otro, el a sigui participa na varios competencia. Na 2017 el a dicidi di participa na e Campeonato Hulandes. Entrena pa diverso DJnan Hulandes prominente, el a pasa tur e rondanan preliminar y dia 16 di December 2017, el a bira e prome Campeon Hulandes femenino. Cu Cynthia ta un DJ talentoso nos nos mester splica mucho mas.
Durante e ultimo añanan Cynthia tabata presenta den festival y fiestanan mas chikito y awo ta tempo pa esunnan di mas grandi. Pronto e lo haci su aparicion durante e festival di Egelpop y despues Heisebierfest na Augustus.
Fuera di ta un DJ, Cynthia tambe ta crea su propio joyanan y tambe ta un visagiste profesional.
Sigur aki na Aruba, tur su famianan ta contento cu e logronan cu te awor aki e tin y ta spera su aparicion den festivalnan mas grandi manera Tomorrowland y ken sa, durante Love Festival na Aruba, hunto cu otro DJnan renombra.
