Abogado John Zara no ta contento "at all" debi na e hecho cu pa di shete biaha den 28 luna e caso di su cliente a wordo trece dilanti pro-forma. Ta trata di e caso di su cliente Juan Junior Quandt, “Blauw” acusa e.o. di intento di asesinato di su ex compañera Shadira Vis. El a bisa na salida di Corte, siman pasa, cu e no sa si ta pasobra “mi no ta sinta bebe koffie of thee cu fiscalnan”, mustrando cu e ta masha rabia cu e no ta mira un movecion pa e caso di su cliente wordo trata.

E sospechoso Jo-Ann L. Jacopucci no a presenta pa tratamento di su caso penal, acusa di a tuma placa di politiconan pa bende nan T-Shirt, petchi, pen y otro material di propaganda pa campaña sin cu nunca el a cumpli. Na tur el a estafa 26 hende y 3 compania. Sumanan ta varia entre 200 florin te cu 6 mil florin. E no a presenta, pero Huez a trata su caso toch. Fiscal a pidi 18 luna di prizon pe, Huez lo dicidi dia 7 di maart proximo.

Un total di 5 sospechoso ta envolvi den e atraco arma riba CMB Airport di dia 13 di september 2011 den cual a horta mas o menos Afl. 666,769.00 bou menasa di arma di candela. Di e 5 sospechosonan envolvi, solamente 2 a presenta. Mester menciona cu mayoria di e sospechosonan ta liber caba, loke sin duda ta haci e caso aki masha peculiar y straño.

Den un entrevista cu e abogado cu ta representa grupo ARU (Affected Residents Urirama) mr. Myriam Malmberg, el a splica cu ta seis persona a busca ayudo huridico cerca dje. Nan ta e habitantenan cu for di inicio a vocifera contra e di dos turbina aki. Durante full 2012 trabaonan na Urirama a tuma lugar siendo cu esaki ta un area protegi y su clientenan constantemente tabata puntra a base di kico esaki ta sosode y e minister a laga sa ta trata aki di un permiso verbal.