Recientemente Corte a dicta sentencia den un caso unda un ex trahado a demanda Arutram pa motibo cu nan a kite “op staande voet”. E motibo: Presenta na trabou bou influencia di alcohol. Ta trata aki di Rufino “Juni” Croes. No ta prome biaha cu a gar’e burachi na trabou, a dune chens y a ofrece ayudo, pero el a sigura cu no mester. Awor el a perde au trabou y Corte a duna AruTram razon di a tuma e decision drastico aki.
Corte a duna di conoce den su sentencia cu e homber aki mester compronde cu e tin un trabou responsabel, transportando hende den un tram habri pa cual mester tira bon bista y mester ta hopi atento. Ta cu motibo Arutram a kit’e ora cu el a test positivo pa alcohol y durante ora di trabou.
Dia 15 di maart ultimo Arutram a laga haci un test di alcohol y droga di su empleadonan na IMSan. E resultado di e empleado aki a sali positivo pa alcohol y e mesun merdia ey el a wordo manda cas. Un dia despues a mand’e un carta cu e ta suspendi, manteniendo su salario pendiente un investigacion riba e hecho cu e tabata bou influencia di alcohol durante ora di trabou, cual ta en pugna cu e Contractivo Laboral Colectivo cu ta bisa: De werknemer zal onder diensttijd niet onder invloed zijn van drugs / alcohol. Dia 22 di maart el a haya su carta di retiro.
E trahado cu no tabata di acuerdo cu e retiro y a bay en contra di e decision aki y a pidi Corte ordena Arutram pa sigui paga su salario y tum’e bek na trabou, pasobra e retiro e no ta consider’e valido.
Corte a analisa si e retiro di inmediato tabatin base y si e hecho y e circunstancianan tabata pidi pa un retiro inmediato. Y tambe si den bodemprocedure Hues tambe lo dicidi cu e retiro tabata na su luga.
No ta den discusion si e trahado a bebe hopi alcohol e anochi anterior prome cu e test di alcohol a wordo haci durante trabou, pasobra el a admiti cu hunto cu otro cinco amigo mas a bebe dos botter di whisky y cerbes. Ta hopi cla cu ora cu a haci e test durante ora di trabou e tabata bou influencia di alcohol. E nivel di alcohol tabata asina halto cu e ta afecta su habilidadnan motorico, e no por analisa cos bon mas y e nivel ey ta afecta su bista, su balansa y oido. Un persona cu ta cay den e categoria aki no mag stuur un vehiculo. Pero e ta nenga cu e mester a stuur tram riba e fecha ey pa cual Corte ta sali di e punto di bista cu e dia ey e tabata controlador di tram.
Articulo den e CAO ta bisa cu e uzo di alcohol ta suficiente pa duna un empleado su retiro. Arutram tin interes pa ehecuta e articulo aki pasobra “rail controllers” mester tene control y ta anda cu hende y mester ta atento pa ehecuta e trabou di un forma sigur. No mester lubida cu ta trata di tramnan habri, unda hendenan facilmente pa stap drenta of baha na cualkier momento y e trabou aki no por wordo haci bou influencia di alcohol. Y, Corte ta bisa, no ta importante ta un hecho cu a sosode un biaha. E ponencia cu IMSan no ta certifica a wordo rechasa, ya cu Corte a considera ta un instituto grandi y ta considera confiabel y profesional.
Tambe ta keda responsabilidad di e empleado of e mester por tabata sa cu e cantidad excesivo di alcohol consumi e dia anterior no ta sali for di su sistema pa e siguiente dia ora cu e mester a bay traha. Tur esaki a pone Corte yega na e conclusion cu Arutram tin suficiente interes pa no tin empleadonan cu no ta test positivo pa alcohol durante ora di trabou. Mirando cu e CAO ta permiti pa retiro di inmediato, e sancion aki no ta demasiado pisa, manera e ex empleado a bisa.
