Dia 21 di augustus awor Corte y Richard Tromp, ex Manager di MFA Noord, lo haya sa cual di e dos opcionnan Gobierno lo tuma. Ambos opcion ta impone dor di Hues. Sea Gobierno ta tum’e bek den servicio of ta pag’e 64 mil florin. Esaki ta un decision cu a cay dia 31 di juli ultimo den Corte.
Richard Tromp tabatin un contracto for di aña 2013 y na ultimo decision a cay pa nombre den servicio di Gobierno y hasta DRH a recomenda esaki. Pero Gabinete Wever Croes a dicidi otro na momento cu nan a asumi poder dia 17 di november ultimo. Pa colmo a lag’e traha te 31 di januari 2018, despues cu nan mes a bisa cu su contracto a vence dia 31 di october 2017. Esey no por ta otro cu un relacion di trabou nobo y cu a wordo finalisa bek dia 31 di januari 2018.
Den e veredicto ta para cu dia 5 di october Departamento di Recurso Humano (DRH) a pidi Minister pa tene na consideracion cu Conseho di Minister dia 22 di augustus 2017 a conseha pa cambia e areglo di trabou cu e empleado aki, entrante 1 di november 2017 den un nombracion pa servicio fiho.
Pero dia 17 di november 2017 Gabinete Wever-Croes a sinta y un luna despues el a haya un carta recordand’e cu su contracto tabata valido pa e periodo di Gabinete Mike Eman II y a finalisa legalmente dia 31 di october 2017. E hecho cu den Conseho di Minister na augustus a dicidi di tum’e den servicio permanente, Gabinete Wever-Croes ta considera cu esaki a wordo tuma den periodo demisionario.
Den reunion di Conseho di Minister dia 6 di december 2017, Gobierno nobo a dicidi di anula e decision di dia 22 di augustus 2017 di Conseho di Minister y a dun’e su retiro entrante 31 di januari 2018. Gobierno a inform’e esaki dia 27 di december 2017. El a sigui traha te dia 31 di januari 2018 y a haya su salario.
Corte ta bisa cu e contracto a yega su final cu yegada di Gabinete Wever Croes. Di otro banda, Corte ta sigui bisa cu den e periodo di 31 di october 2017 te 17 di november 2017, Gabinete Mike Eman II tabat demisionario, pero esey no ta nifica cu ya caba e contracto a yega na su final. For di 17 di november 2017 te cu 31 di januari 2018 e funcionario a sigui traha. No ta bisa a base di kico esaki a sosode y no por ta otro cu basa riba e hecho cu tin un acuerdo nobo. E demandante a kere tambe cu ta esaki Gobierno tabata kiermen, pasobra un acuerdo cu a finalisa caba dia 31 di october 2017 no tabatin necesidad pa finalis’e atrobe dia 31 di januari 2018.
Corte ta considera cu Gobierno ta mara na principionan general di bon gobernacion. Tambe ora cu ta trata di acuerdonan laboral, manera den e caso aki. E mester a comporta su mes como un bon doño di trabou. Ta trata di un contracto cu ta data di aña 2013, e persona en cuestion tin 54 aña. E chensnan p’e riba mercado laboral ta hopi dificil. Esaki ta cosnan cu Gobierno como doño di trabou no a tene cuenta cun’e. Nan no a bisa den e carta tampoco pakico exactamente e ta wordo retira. E carta ta uno general di retiro y ta basa solamente riba un afscheidsbeleid y e carta ta difamatorio.
E demandante a pasa den un procedura di solicitud y DRH mes, durante cu e Gabinete tabata demisionario, a conseha e Minister pa tum’e den e aparato Gubernamental (Ambtenaar). Corte ta bisa cu tur cos ta mustra cu Richard Tromp a wordo retira simplemente pasobra el a yega di wordo tuma den servicio door di Gabinete Mike Eman II. E retiro no a bay compaña cu un oferta pa daño y perhuicio. P’esey e retiro no ta cumpli cu e exgencianan di Bon Gobernacion y ta inaceptabel.
Corte ta bisa tambe cu ta conoci cu Gobierno mester reduci gasto di personal y cu nan kier hiba nan propio maneho di personal.
Teniendo cuenta cu e ta den servicio desde 15 di april 2013, cu el a tuma un salario mas abou, basa riba loke ambtenaarnan ta haya y mirando su edad, Corte ta ordena reanuda e relacion di trabou y cu esaki ta cay afo ora cu Gobierno paga un compensacion di 65 mil florin.
Pa e motibo aki a manda e caso bek riba rol pa dia 21 di augustus awo. E dia ey Gobierno por informa si ta reanuda e relacion di trabou of ta prefera paga e compensacion. Den e periodo aki Gobierno no ta obliga pa paga e salario y ta bini bek na vigor pa pag’e si e decision final ta cu e mester reanuda e relacion di trabou.
