Awe diaranson a cuminsa e di 37 “Vitrina Turística ANATO 2018” na Bogota, Colombia. Aruba ta participando fielmente pa di 34 aña caba, promoviendo nos isla y tur nos facilidadnan, recursonan, servicionan y actividadnan turistico. Varios hotel, operadornan di tours y otro companianan di turismo a join cu Aruba Tourism Authority den e evento aki.
ANATO ta para pa Asociacion Colombiana de Agencias de Viajes y Turismo. E ta e oportunidad pa Colombia expone su mes na otro paisnan y na mes momento pa otro paisnan ofrece e publico Colombiano pa bishita nan destinacion. Tin 32 departamento presente, mas di 30 pais, 1000 booth y ta conta cu 20.000 bishitante den e tres dianan di e evento. Awe ta prome dia, ta continua diahuebs y ta caba diabierna.
Oficina di Turismo di Aruba na Colombia ta coordina e evento aki, pa tur e añanan. Ta bon pa bisa cu ATA Colombia ta celebra 35 aña di existencia e aña aki. Cu e cambionan den Latino America y e desaroyo economico den e pais, e ta priminti di sigui crece como un mercado pa Aruba den e añanan nos dilanti.
Riba e prome dia awe, e Director di ATA Latino America, Miriam Dabian, tabata masha honra cu bishita di Minister di Desaroyo Economico di Corsou, Dr. Steven Martina, kende tabata compaña tambe pa Joris Jurriëns, kende ta “Ambassaderaad” di Embaha di Reino Hulandes na Colombia. Den cuadro di nos relacion di ruman, a pasa bishita e booth di Aruba. Mester menciona cu e aña aki Corsou ta pais anfrition di e evento y pesey a trece un Minister na e evento, mescos ta e orkesta Gio & Orkesta.
