Diaranzon mainta a yama un conferencia di prensa cu caracter di urgencia na WEB. E tema ta e situacion di gas cu ta afectando e funcionamento riba Waf di Barcadera. Un situacion cu ta afectando comercio, operacion di waf di container y tambe birando un problema pa barconan cu mester pasa laga container. Tambe tin e grupo di trucknan cu ta lastra container cu ta sufriendo masha hopi mes cu e problema.
Algun dia pasa caba e Director di WEB a splica nos cu e fuel oil cu nan ta uzando ta e mesun cu 80 aña pasa. Gobierno a cay aden pasobra na diferente ocasion keho di ASTEC y otronan trahando na Waf di Barcadera ta yegando cerca nan. A tene reunion y a priminti pa traha riba un solucion. E solucion no tey ainda pero mientrastanto a mira diferente protesta na Barcadera cerca e trahadornan di ASTEC, Truck Drivernan y diamars mainta hasta Douane.
Minister Xiomara Maduro a bay te na ASTEC pa sinta cu nan y tambe Director di Douane y Sindicato SADA tabata presente. Despues di e reunion a dicidi cu ta trahando riba e solucion di parti di WEB.
E solucion ta cambio di fuel oil den 8 siman. Kiermen asina cu e Fuel Oil actual termina lo cuminsa uza of lo switch riba un fuel oil di miho calidad cu menos sulfur. Esey nifica tambe cu mester paga mas pa bari di fuel oil.
Ta papia di un aumento di 7% riba cada bari di Fuel Oil di mihor calidad cu menos sulfur. Cu esaki lo baha e molester actual di gas cu ta afectando operacion na Waf di Barcadera.
Haciendo un calculacion, si e bari costa por ehempel 60 dollar pa bari, cu e fuel oil nobo nifica cu mester paga algo mas cu 64 dollar pa bari. Kico esaki lo nifica pa e operacion di WEB y prijs di awa y coriente ta algo cu WEB mester splica of contesta den e conferencia di prensa yama cu caracter di urgencia.
Asina mes WEB ta trahando duro pa baha e cantidad di uzo di fuel oil y uza sistemanan alternativo y limpi pa produci coriente. E proceso aki ta bay dura largo. Mescos ta wordo menciona cu mester pone cierto filter tambe pa mengua e polucion cu ta bay den aire y cu ta causa molester na waf di Barcadera.
Diaranzon mainta nos redaccion lo tey pa 10:30am na WEB y asina haya sa exactamente kico ta e solucion y cuanto e lo costa.
