Awe a conclui IPKO cu a wordo teni na Aruba. E prome IPKO di e parlamento nobo. Ta e prome IPKO cu e delegacion di Aruba, con ta consisti di hopi parlamentario nobo, pa prome biaha ta experencia esaki. Di berdad tabata un reunion hopi fructifero.
Segun lider di fraccion di MEP, parlamentario Rocco Tjon, a hiba discusionnan hopi alcaso, riba problemanan, riba retonan. Pero tambe riba oportunidadnan cu e cuater paisnan di reino cu ta confronta nan mes cun’e y conhunto, por uni forsa pa por soluciona esakinan. Ta cuater parlamento cu ta forma parti di reino Hulandes. A discuti temanan riba aspectonan di energia, riba meta di desaroyonan sostenibel. Pero como tambe oportunidadnan cu tin door di coopera cu otro, unda por sali dilanti. Obviamente e situacion politico regional, tambe a hunga un rol importante. Tambe tabata tin atencion di e parlamentarionan Hulandes, como cu nan ta aki pa representa Hulanda, pero tambe islanan BES, Boneiro den e caso aki, cu tambe ta wordo afecta door di e blokeo cu ta tumando luga.
A haci tambe bishitanan na diferente instancia. A bishita hospital awe mainta, unda cu a haya un recorido di e instalacionnan, pero tambe na Refineria di Aruba, unda cu por a presencia un demostracion di e planta di alga.
Mas cu tur cos atrobe, a cera conoci cu otro, a reenforsa e relacionnan cu tin entre e parlamentarionan di e cuater paisnan y a stel vast tambe e agenda pa e proximo IPKO, cu lo tuma luga na Mei na Den Haag, Hulanda, unda cu lo sigiu discuti riba temanan.
E tabata un reunion hopi fructifero. E delegacionnan tambe a comparti esaki y e ta un bon pia pa sigui y pa sigui intensifica y fortifica e relacionnan den reino.
