Coca Cola Nacional cla pa retene nan titulo di campeon di futbol Division di Honor

E campeonato di Division Honor poco poco ta yegando su final y Coca Cola Nacional a yega kwart final. Coca Cola Nacional ta preparando nan mes duro pa asina por defende nan titulo di campeon.

Coca Cola Nacional: Nos ta cla pa retene nos trofeo di campeon den futbol Division di Honor

Posted by 24ora on Wednesday, May 16, 2018

Un total di 4 team a clasifica p’e kwart final y Coca Cola Nacional ta preparando nan mes pa asina nan sali den e prome 2 team y pa wanta e titulo, asina Silo Brete di Coca Cola Nacional a expresa. E prome wega di Coca Cola Nacional lo ta diasabra awo contra di SV Dakota. E clasificacion aki no tabata facil pa niun team, pasobra e biaha aki tabatin 7 team duro pero tambe esunnan mas abou a duna bataya. Coca Cola Nacional a clasifica p’e play-off, pero den e ultimo 4 añanan pa Silo Brete e competencia aki ta esun di mas duro.

Silo Brete ta invita pueblo di Aruba, specialmente di Noord, pa yega stadion Guillermo Trinidad pa apoya Coca Cola Nacional, cu semper a saca cara di Noord. Ta invita fanaticonan pa bin apoya y stimula Coca Cola Nacional, pasobra stadion ta den nan bario y nan cas. “Ban mustra cu nos ta bay den nan cas. Gana nan y bin cu e triunfo pa Noord, pa nos clasifica y retene e titulo un biaha mas”.

E aña aki SV Dakota ta buscando pa bay cu e titulo despues di hopi aña y Coca Cola Nacional ta kere cu e aña aki un biaha mas nan lo keda den buskeda di dje, pasobra Coca Cola Nacional tin e intencion di retene e titulo.

Ta bon pa menciona cu Coca Cola Nacional lo hunga e weganan di kwart final y te final cu e ekipo di hungadonan cu a yega te na e nivel aki. Bisando esaki, e ekipo no ta conta cu ningun hungado cu a drenta awor pa reenforsa. E hungadonan ta hopi entusiasma, ta entrenando casi tur dia y ta cla pa retene nan titulo di campeon.

A funda Deportivo Nacional dia 15 di Maart 1970 y desde e tempo ey a haci historia den e deporte rey di futbol. Nan ta profila den tur liga di futbol, manera ta division mini baby, baby, Lifida A, Lifida B, Mayor, Junioren y Division Honor. Tambe nan ta den e liga veterano 35, 40, 50 y 60. Mas o menos 300 futbolista ta hunga pa Deportivo Nacional den tur division incluyendo e muchanan cu ta hunga den Lifida. Deportivo Nacional ta conta cu sosten di su patrocinado Coca Cola.