Diadomingo pa mas o menos 5:45pm a bati alarma pa un persona cu a menasa di atraca un restaurant Chines. Varios unidad di Polis a sali pa Great Rich Bar & Restaurant na Paradera. Ey a topa cu un homber cu a lanta cu e trahadonan y e clientenan eyden.
Na e sitio a compronde cu un homber a drenta y a bestel un drink. Ora cu el a caba di consumi e alcohol, el a bisa e bartender cu e cup no tabata full yena y a pidi un otro. A splik’e cu esey ta e tamaño di e cup. E homber a rabia y bisa cu e lo atraca e luga y a sali pafo. Claro cu e menasa a spanta tanto e trahadonan como e clientenan disfrutando di nan diadomingo trankil, sea comiendoncu famia of sinta na bar combersando cu amigonan.
Un rato despues e homber a drenta atrobe pero e biaha aki decidido pa bringa cu e trahadonan di e bar. Algun cliente cu a purba papia cune no tabatin mucho suerte. Den esey patruyanan di Polis a yega na e sitio y a constata cu mas bien e cliente aki tabata burachi y a bira fastioso.
En todo caso e lo siña su les awor cu riba un diadomingo cu un Restaurant yen di cliente, no por haci tipo di expresionnan asina cu lo atraca e luga, ni den chansa, pasobra e lo costa Bo libertad riba un pleno diadomingo.
