Awe diabierna 23 di februari ta un dia scur pa empleadonan di contratistanan trahando pa e consorcio den CITGO Aruba. Ora a presenta na trabou pa subi warda di 7:00am, a constata cu a desactiva nan “badge” y como tal porta no a habri pa nan drenta y bay trabou. No ta sigur ainda cuanto trahado no por a drenta pero pa e prome warda, ta estima cu e ta entre 50 pa 75 empleado di Goedecke, Doushar y Oduber Contractor.
E scenario aki no ta bini di sorpresa, specialmente despues cu ehecutivonan di CITGO a bin Aruba pa informa Gobierno di e situacion reinando pa cu financiamento y e embargo cu Gobierno Mericano a pone cu ta strobando e financiamento di institutonan financiero pa cualkier compania di of liga na Venezuela. Como cu no tin un bista di con hopi e proceso aki por dura, CITGO Aruba a anuncia cu nan ta “slow down” e proyecto di rehabilitacion y lo reduci e cantidad di contratistanan trahando den e refineria. Ta estima cu mas o menos 345 trahado lo mester bay cas. 
E grupo di awe mainta a haya di tende cu nan no por keda para dilanti e refineria y cu nan mester bay na oficina di nan respectivo contratista local. Ey nan a haya di tende cu CITGO a termina e contract den forma inmediato cu nan y cu ta pone cu nan no tin otro opcion cu manda trahadonan cas. Como cu a keda algun proyecto vigente, e contratistanan lo mira unda por pusha mas trahado posibel pa keda na trabou, mientras cu a pidi e demas pa bay cas pendiente nan retiro.
Minister Glenbert Croes no por atende directamente cu CITGO
Mientrastanto Minister Glenbert Croes a anuncia ayera despues di a reuni cu Departamento di Labor cu ni CITGO ni ningun contratista a haya permiso pa kita ningun hende for di trabou ainda. Cuanto autoridad Departamento di Labor tin pa stroba e proceso aki no ta conoci, pasobra si CITGO stop di paga e contratistanan, ta imposibel pa nan mantene e trahadonan na trabou, pasobra sino nan lo bay bancarota.
Contratistanan local ta traha pa contratista Venezolano
E consorcio di contratistanan Y&V di Francia y Technip di Venezuela a contrata un compania di construccion Venezolano yama VEC, cu ta pertenece na e mesun Y&V, pa cera contract cu e contratistanan local. Ayera tardi 3:50pm nan a haya carta di VEC cu pa 4:00pm nan ta kita for di trabou. Mesora VEC a informa CITGO Aruba pa desactiva badge di tur e trahadonan, cu consecuencia cu awe nan no por a drenta e refineria. Mientrastanto e contratistanan local ta pendiente un reunion awe cu CITGO Aruba pa busca un forma pa traha directo cu nan, pa e trabounan pendiente. 
Mi a kita pa miho, wak mi ki sin trabou awo
Por lo menos un di e trahadonan a bisa 24ora.com awe mainta trempan dilanti porta di CITGO cu ta un dia scur pe. E tabatin un bon trabou den un otro compania, pero a kita pa bin “pa miho” den e refineria. E ta casa cu 3 yiu y cu wowo yen di awa e ta constata cu e ta perdiendo su trabou y no sa unda pa cuminsa. Na unda e tabata traha algun luna pasa, nan a tuma otro hende caba, pues ta keda riba caya awo. Na e contratista nan a bise cu ta pensa cu mas o menos na September lo inicia e trabounan bek pero cu mientrastanto, e ta sin trabou, cuminsando for di 1 di maart!
Tocante CITGO
CITGO Petroleum Corporation (CITGO) ta funda na aña 1910, ta un compania Mericano pero cu ta pertenece na Venezuela, cu ta transporta y mercadea combustibel di transporte, lubricantenan y productonan industrial petrokimico. E oficina principal di CITGO ta na Houston, Texas. Nan ta specificamente den e industria di gasolin y azeta. Su doño ta CITGO Holding Inc. bou unda e tin no menos di 3400 empleado den servicio directo. Nan tin refineria na Lake Charles, Corpus Christi, Romeoville y awor tambe na Aruba
Tocante CITGO Aruba
CITGO Aruba Refining N.V. ta un compania netamente Arubiano, den un grupo di companianan di operacion cu ta resorta bou di PDV Holding Inc, cu ta un doño indirecto di CITGO Petroleum Corporation y ta un subsidiario di Petroleos de Venezuela S.A. (PDVSA), e compania nacional di petroleo di Republica Bolivariana di Venezuela.
