Chauffeur di Toyota a zwaai boter riba auto di Rusty

Diadomingo, den careda di 7’or y 25 di anochi, despues cu e parada di blaas a pasa na San Nicolas, tur hende tabata bayendo abao, entre otro e conocido cantante Rusty. Nan tambe a participa den e parada y e tabata den su auto hunto cu e integrantenan di N’Fuzion.

Yegando na e rotonde banda di aeropuerto, dado momento un auto marca Toyota a pasa Rusty y a zwaai un botter di Heineken riba su auto. Rusty, naturalmente a reacciona di tal manera cu el a bay reclama e persona, dicon el a comete tal acto. Dado momento e pasahero di Toyota a baha for di e auto y a scop e auto di Rusty, causando daño na esaki. Debi na e incidente, e trafico a tranca full, creando asina un confusion cerca su coleganan di banda, kendenan a baha pa bin wak kico ta pasando.

E chauffeur, kende a manda e botter di cerbes, na prome instante a bay pa purba papia, pero despues a bira agresivo. E pasahero, kende a causa daño na e auto, a bis’e pa bay. Den e auto tabata tin un pasahero mas kende tabata un dama. Despues di e incidente, Rusty a bay na warda di Playa pa duna keho na polis.